സി.പി.എമ്മിന്‍റെ മലപ്പുറം പരാമർശങ്ങൾ: പരോക്ഷ വിമർശനവുമായി സമസ്തവേദിയിൽ വി.ഡി. സതീശൻ

തിരുവനന്തപുരം: മലപ്പുറത്തെ കുറിച്ച്​ സി.പി.എം നേതാക്കളുടെ പരാമർശങ്ങളെ പരോക്ഷമായി വിമർശിച്ച്​ സമസ്ത വേദിയിൽ പ്രതിപക്ഷ നേതാവ്​ വി.ഡി. സതീശൻ. മലപ്പുറത്തെയും മലബാറിനെ കുറിച്ചും പലരെയും തൃപ്​തി​പ്പെടുത്തുന്നതിന്​ ഓരോരുത്തരും ഇഷ്ടാനുസരണം ഓരോ കാലത്തിനനുസരിച്ച്​ പല പരാമർശങ്ങളും നടത്തിയിട്ടുണ്ടെന്നും അതൊന്നുമല്ല, മലപ്പുറവും മലബാറും എന്നും സതീശൻ വ്യക്തമാക്കി.

സമസ്ത മതപഠന രംഗത്ത്​ മാ​ത്രമല്ല, മറ്റ്​ പൊതുവിദ്യാഭ്യാസ രംഗത്തും വലിയ മാറ്റം​ സൃഷ്ടിച്ചിട്ടുണ്ട്​. പലരും പല രീതിയിലും ഇതിനെ വ്യഖ്യാനിച്ചിട്ടുണ്ട്​. അതൊന്നും പറയാൻ താൻ ഉദ്ദേശിക്കുന്നില്ലെന്നും സതീശൻ പറഞ്ഞു.

സമസ്തയുടെ ഒരു നൂറ്റാണ്ടുകാലത്തെ ചരിത്രം പ്രതിപാദിക്കുന്ന ‘കോൺഫ്ലുവൻസ്’ കോഫി ടേബിൾ ബുക്കിന്‍റെ പ്രകാശന വേദിയിൽ മന്ത്രി വി. അബ്​ദുറഹി​മാന്‍റെ സാന്നിധ്യത്തിൽ കൂടിയായിരുന്നു പരാമർശം. പച്ചവെള്ളത്തിനു പോലും തീപിടിപ്പിക്കുന്ന കാലത്ത് സമസ്തയുടെ സാന്നിധ്യം നാടിന് ആശ്വാസകരമാണ്​. അവസരം മുതലാക്കാൻ ചിലർ തക്കം പാർത്തു നിൽക്കുകയാണ്​.

എരിതീയിൽ എണ്ണയൊഴിക്കാൻ പ്രവർത്തിക്കുന്ന സംഘടനകളുണ്ട്​. ചിലർ ചില സമുദായത്തിലെ വരേണ്യ വിഭാഗത്തിനു വേണ്ടി പ്രവർത്തിക്കുന്നവരാണ്​. എന്നാൽ, എല്ലാവരെയും ചേർത്തു നിർത്തുക എന്ന പ്രവാചക സന്ദേശം പകരുന്ന സമസ്തയുടെ സാന്നിധ്യം ആശ്വാസകരമാണെന്നും വി.ഡി. സതീശൻ കൂട്ടിച്ചേർത്തു.