‘പാലക്കാട്ടേത്​ സി.പി.എം-ബി.ജെ.പി സംയുക്ത മദ്യനിർമാണശാല; കമ്പനി ഉടമക്ക്​ യോഗി ആദിത്യനാഥുമായി ഉറ്റ ബന്ധം’

റിയാദ്​: പാലക്കാട്ട്​ ആരംഭിക്കുന്നത്​ സി.പി.എം-ബി.ജെ.പി സംയുക്ത മദ്യനിർമാണശാലയാണെന്ന്​ കോൺഗ്രസ്​ നേതാവ്​ സന്ദീപ്​ വാര്യർ. പാലക്കാട്ട്​ അത്​ നിർമിക്കാൻ ലൈസൻസ്​ നേടിയ ഒയാസിസ്​ ബ്രൂവറീസ്​ ബി.ജെ.പിയുമായി അടുത്ത ബന്ധമുള്ള കമ്പനിയാണ്​ എന്നാണ്​ തനിക്ക്​ മനസിലാക്കാൻ കഴിഞ്ഞതെന്നും​ റിയാദിൽ വാർത്താസമ്മേളനത്തിൽ സന്ദീപ്​ വാര്യർ വ്യക്തമാക്കി.

ഈ മദ്യനിർമാണ കമ്പനിയുടെ ഉടമക്ക്​ ഉത്തർപ്രദേശ്​ മുഖ്യമന്ത്രി യോഗി ആദിത്യനാഥുമായി അടുത്ത ബന്ധമുണ്ട്​. നേരത്തെ ബി.ജെ.പിയുടെ സഖ്യകക്ഷിയായിരുന്ന അകാലിദളിന്‍റെ എം.എൽ.എ ആയിരുന്നയാളുടെ കമ്പനിയാണ്​ ഇത്​. മാത്രമല്ല എൻഫോഴ്​സ്​​മെൻറ്​ ഡയറക്​ടറേറ്റ്​ നിരവധി കേസുകളിൽ അന്വേഷണ വിധേയമാക്കുന്ന കമ്പനി കൂടിയാണ്​ ഒയാസിസ്​ ബ്രൂവറീസ്​. മദ്യനിർമാണവുമായി ബന്ധപ്പെട്ട പല ക്രമക്കേടുകളും നടത്തിയതായി ആരോപണമുള്ള കമ്പനിയാണ്​.

ജല മലിനീകരണത്തി​െൻറ പേരിൽ നടപടി നേരിട്ട കമ്പനിയാണ്​. അത്തര​മൊരു കമ്പനിയെയാണ്​ പാലക്കാട്ട്​ മദ്യനിർമാണം ഏൽപിക്കാൻ വേണ്ടി സംസ്ഥാന സർക്കാർ ഇപ്പോൾ മുന്നോട്ട്​ വന്നിട്ടുള്ളത്​. ഈ കമ്പനിയെ തന്നെ ഇതേൽപിക്കുന്നതിന്​ പിന്നിൽ വലിയ ഗൂഢാലോചന നടന്നിട്ടുണ്ടോ എന്നുള്ളത്​ സ്വാഭാവികമായും സംശയിക്കപ്പെടാവുന്നതാണ്​. പ്രത്യേകിച്ചും ബി.ജെ.പി നേതൃത്വവുമായി അടുത്ത ബന്ധമുള്ള, ഉത്തർപ്രദേശിൽ വലിയ തോതിൽ നിക്ഷേപം നടത്തിയിട്ടുള്ള ഒരു കമ്പനി തന്നെയാണ്​ ഒയാസിസ്​ ബ്രൂവറീസ്​. ഇതിന്​ പുറകിൽ നടന്നിട്ടുള്ള ഇടപാടുകൾ എന്താണ്​, നാടകങ്ങൾ എന്താണ്​ എന്ന്​ പരിശോധന വേണ്ടതാണ്​.

സർക്കാരാണ്​ ഇക്കാര്യങ്ങൾ വ്യക്തമാക്കേണ്ടത്​. എന്തുകൊണ്ട്​ ഈ കമ്പനിക്ക്​ അംഗീകാരം കൊടുത്തത്​. പ്രത്യേകിച്ച്​ കൊക്കോകോളയും പെപ്​സിയും ജലചൂഷണം നടത്തിയതിന്‍റെ പേരിൽ ജനങ്ങൾ ദുരിതം അനുഭവിക്കുന്ന പാലക്കാട്ട്​ ജലചൂഷണം നടത്തിയതി​ന്‍റെ പേരിൽ നിയമനടപടി നേരിടുന്ന ഒരു കമ്പനിയെ തന്നെ കൊണ്ടുവരുന്നതിന്​ പിന്നിലുള്ള ബി.ജെ.പി, സി.പി.എം അജണ്ട എന്താണ്​, അത്​ കൂടി വ്യക്തമാക്കേണ്ടത്​ സർക്കാരാണ്​. കേരളം ഇപ്പോൾ ഭരിച്ചു കൊണ്ടിരിക്കുന്നത്​ സി.ജെ.പിയാണ്​. കേരളത്തിൽ ഇതുപോലെ ഒരു കൂട്ടുകൃഷികൾ നടക്കുന്നുണ്ട്​. അതി​നെയെല്ലാം വെളിച്ചത്ത്​ കൊണ്ടുവരേണ്ടതുണ്ട്​. ​ബ്രൂവറീസ്​ ഇട​പാട്​ അതി​ന്‍റെ തുടക്കമാവുമെന്നും സന്ദീപ്​ വാര്യർ വ്യക്തമാക്കി.

കോൺഗ്രസിലേക്ക്​ വന്നത്​ ഒരു ഉപാധിയും വെച്ചല്ല. ഏതെങ്കിലും പദവി ആഗ്രഹിച്ചു വന്നതല്ല. മാനസികമായി വലിയ സന്തോഷവും ആശ്വാസവും മലയാളി പൊതുസമൂഹത്തിൽ നിന്ന്​ വലിയ സ്വീകാര്യതയും ലഭിക്കുന്നു എന്നത്​ തന്നെയാണ്​ വലിയ കാര്യം. അതേ ഞാനാഗ്രഹിക്കുന്നുള്ളൂ. പാർട്ടി എന്ത്​ പറയുന്നുവോ അത്​ ചെയ്യുന്ന ഒരു പ്രവർത്തകനായി കോൺഗ്രസിൽ തുടരുമെന്ന്​ സന്ദീപ്​ പറഞ്ഞു.

നാനാജാതി മതസ്ഥരായിട്ടുള്ള ആളുകളും കോൺഗ്രസല്ലാത്ത, മറ്റ്​ രാഷ്​ട്രീയ പാർട്ടികളിലുള്ളവർ വരെ ത​ന്‍റെ ഈ മാറ്റത്തെ അംഗീകരിക്കുകയും അനുമോദിക്കുകയും ചെയ്യുന്നുണ്ട്​. സാഹോദര്യം ആഗ്രഹിക്കുന്ന, കേരളം നിലനിൽക്കണം എന്നഗ്രഹിക്കുന്ന മലയാളി സമൂഹത്തി​ന്‍റെ വലിയ പിന്തുണ ലഭിക്കുന്നുണ്ട്​. സി.പി.എം ചേരിയിലുള്ളവർ പോലും ഈ തീരുമാനത്തി​ന്‍റെ പേരിൽ ചേർത്തു പിടിക്കുന്നുണ്ട്​. ബി.ജെ.പിയിലുള്ള ചിലർ അതിനുള്ളിൽ അനുഭവിക്കുന്ന ബുദ്ധിമുട്ടുകളെ കുറിച്ച്​ തന്നോട്​ പറയാറുണ്ട്​. താനെടുത്ത തീരുമാനം ശരിയായിരുന്നെന്ന്​ ഇന്നു പോലും പറഞ്ഞവരുണ്ട്​.

ഒരു സാദാ മലയാളി യുവാവായിട്ട്​ ജോലിക്കായാണ്​ ആദ്യമായി സൗദിയിലേക്ക്​ വന്നത്. 2006 വരെ റിയാദിൽ ജീവിച്ചു. ഈ വരവിൽ റിയാദിലെ എല്ലാ വഴികളിലൂടെയും സഞ്ചരിച്ച്​ ആ പഴയ ഓർമകൾ വീണ്ടെടുക്കണമെന്നുണ്ടെന്നും സന്ദീപ്​ വാര്യർ പറഞ്ഞു.

ഒ.ഐ.സി.സി പാലക്കാട് ജില്ലാകമ്മിറ്റിയുടെ വാർഷികാഘോഷ പരിപാടിയിൽ പ​ങ്കെടുക്കാനാണ്​ ​സന്ദീപ്​ വാര്യർ റിയാദിലെത്തിയത്​. വാർത്താസമ്മേളനത്തിൽ ഒ.ഐ.സി.സി ഭാരവാഹികളായ ഫൈസൽ ബാഹസൻ, ശിഹാബ് കരിമ്പാറ, രാജു പാപ്പുള്ളി, ഹകീം പട്ടാമ്പി, മൊയ്‌ദു മണ്ണാർക്കാട്​ എന്നിവരും പ​ങ്കെടുത്തു.