പാലായിൽ ജോസിനെക്കാൾ ജനകീയത കാപ്പനെന്ന്​ സി.പി.ഐ; കേരള കോൺഗ്രസിനെ ഉൾക്കൊള്ളാൻ ഇടതുപക്ഷത്തെ ഒരു വിഭാഗം തയാറായില്ല

തിരുവനന്തപുരം: നിയമസഭ തെരഞ്ഞെടുപ്പിൽ പാലാ മണ്ഡലത്തിൽ യു.ഡി.എഫ്​ സ്ഥാനാർഥി മാണി സി. കാപ്പനായിരുന്നു ഇടതു സ്ഥാനാർഥി ജോസ്​ കെ. മാണിയെക്കാൾ ജനകീയനെന്ന്​ സി.പി.​െഎ തെരഞ്ഞെടുപ്പ്​ അവലോകന റിപ്പോർട്ട്​. ഇത്​​ പരാജയ കാരണമാ​യെന്ന്​ കോട്ടയം ജില്ല കമ്മിറ്റി വിലയിരുത്തൽ ചൂണ്ടിക്കാട്ടി നേതൃത്വം പറയുന്നു. ഇടതുമുന്നണി പ്രവേശനം കൊണ്ട്​ കേരള കോൺഗ്രസിനാണ്​​ (എം) നേട്ടമുണ്ടായ​െതന്നും റിപ്പോർട്ട്​ കുറ്റപ്പെടുത്തുന്നു.

ഉപതെരഞ്ഞെടുപ്പിൽ എൽ.ഡി.എഫ്​ പിടിച്ചെടുത്ത പാലാ മണ്ഡലമാണ്​ യു.ഡി.എഫ്​ തിരിച്ചുപിടിച്ചത്​. യു.ഡി.എഫി​െൻറ ഭാഗമായിരുന്ന കേരള കോൺഗ്രസിനെ ഉൾക്കൊള്ളാൻ ഇടതുപക്ഷത്തെ ഒരു വിഭാഗം തയാറായില്ല. കേരള കോൺഗ്രസ്​ പ്രവർത്തകരിലും നിസ്സംഗതയുണ്ടായിരുന്നു.

ഒരു പഞ്ചായത്ത് ഒഴികെ ബാക്കി എല്ലായിടവും യു.ഡി.എഫ് സ്ഥാനാർഥിക്ക് ഭൂരിപക്ഷം ലഭിച്ചു. കേരള കോൺഗ്രസ്​ ശക്തികേന്ദ്രങ്ങളായ പാലായിലും കടുത്തുരുത്തിയിലും പരാജയപ്പെട്ടപ്പോൾ എൽ.ഡി.എഫ് സ്വാധീന മേഖലകളിൽ കേരള കോൺഗ്രസ് സ്ഥാനാർഥികൾ ജയിച്ചു. കുണ്ടറയിലെ തോൽവിയിൽ സി.പി.എം സ്ഥാനാർഥിയുമായിരുന്ന ജെ. മേഴ്​സികുട്ടിയമ്മയെ റിപ്പോർട്ട്​ വിമർശിക്കുന്നു.

'എൽ.ഡി.എഫ് സ്ഥാനാർഥിയുടെ സ്വഭാവരീതിയെക്കുറിച്ച് വോട്ടർമാർക്കിടയിൽ രഹസ്യമായ മുറുമുറുപ്പ് ഉണ്ടായിരുന്നു. വിനയശീലനായ യു.ഡി.എഫ് സ്ഥാനാർഥി ഈ ന്യൂനത മുതലാക്കി വോട്ടർമാർക്കിടയിൽ നല്ല അഭിപ്രായം തുടക്കത്തിലേ സൃഷ്​ടിച്ചെടുത്തു. ബി.ജെ.പിയെയും എൻ.എസ്.എസിനെയും വശത്താക്കി. കുണ്ടറ യു.ഡി.എഫ്​ തിരിച്ചു​പിടിച്ചു' ^റിപ്പോർട്ടിൽ പറയുന്നു.

സംഘടനാ സംവിധാനമില്ലാത്ത ദുർബലമായ ഒരു പാർട്ടിയുടെ പ്രതിനിധി കുന്നത്തൂരിൽ മത്സരിച്ചുവെന്നാണ്​ കോവൂർ കുഞ്ഞുമോനെക്കുറിച്ചുള്ള നിരീക്ഷണം. ഇതിലെ പോരായ്​മകൾ സി.പി.ഐയും സി.പി.എമ്മും ചേർന്ന് പരിഹരിച്ച് മുന്നേറുകയാണ് ചെയ്തത്​.

കൊട്ടാരക്കരയിൽ കെ.എൻ. ബാലഗോപാലിനെ ഒതുക്കാൻ സി.പി.എമ്മിനുള്ളിൽ നിന്നുതന്നെ ശ്രമമുണ്ടായെന്നും റിപ്പോർട്ട്​ ചൂണ്ടിക്കാട്ടുന്നു. സ്ഥാനാർഥി മോഹികളായ ചിലർ സീറ്റ് കിട്ടാതെ വന്നപ്പോൾ നിരാശരാകുകയും പ്രവർത്തനത്തിൽ പിന്നാക്കംപോകുകയും ചെയ്​തു. യു.ഡി.എഫ് സ്ഥാനാർഥിയുടെ മികവും കുടുംബബന്ധങ്ങളും എൽ.ഡി.എഫിന്​ ഭൂരിപക്ഷം കുറയാൻ കാരണമായി.