കോവിഡ് വാക്സിൻ സൗജന്യമായി നല്‍കും എന്ന് പറഞ്ഞതിൽ ചട്ടലംഘനമില്ല-മുഖ്യമന്ത്രി

കണ്ണൂർ: കോവിഡ് വാക്സിൻ സൗജന്യമായാണ് സംസ്ഥാനം നൽകുകയെന്ന് മുഖ്യമന്ത്രി പിണറായി വിജയൻ. പെരുമാറ്റചട്ടം നിലവിൽ വന്നതിനാലാണ് വാർത്താസമ്മേളനത്തിൽ ഇക്കാര്യം വിശദീകരിക്കാൻ കഴിയാതിരുന്നതെന്നും മാധ്യമപ്രവർത്തകരുടെ ചോദ്യത്തിന് മറുപടിയായി മുഖ്യമന്ത്രി പറഞ്ഞു. നമ്മുടെ രാജ്യത്ത് കേരളത്തില്‍ മാത്രമാണ് കോവിഡിനെതിരായ ചികിത്സ മുഴുവനും സൗജന്യമായിട്ടുള്ളത്. അങ്ങനെയുള്ള സംസ്ഥാനത്ത് കോവിഡിനെ പ്രതിരോധിക്കാനുള്ള ചെറിയ പൈസയുടെ കുത്തിവെപ്പിനുള്ള പൈസ ഇങ്ങോട്ട് പോരട്ടെ എന്ന് സംസ്ഥാനം വിചാരിക്കുമോ എന്നും മുഖ്യമന്ത്രി ചോദിച്ചു.

ഇവിടെ ഞങ്ങള്‍ തുടര്‍ച്ചയായി ഇന്നേ വരെ സൗജന്യ ചികിത്സയാണ് നല്‍കിയത്. അതിന്റെ ഭാഗം തന്നെയാണ് പ്രതിരോധ നടപടിയെന്നും മുഖ്യമന്ത്രി പറഞ്ഞു.