കേരളത്തിലെ കോവിഡ്​ വ്യാപനം ആഴ്ചകൾ കൂടി തുടരും ; പ്രതിദിന രോഗികളുടെ എണ്ണം 40,000 കടക്കുമെന്നും മുന്നറിയിപ്പ്​

തിരുവനന്തപുരം: കേരളത്തിലെ കോവിഡ്​ വ്യാപനം കുറച്ച്​ ആഴ്ചകൾ കൂടി തുടരുമെന്ന്​ മുന്നറിയിപ്പ്​. ഓണത്തിനോട്​ അനുബന്ധിച്ച്​ നൽകിയ ഇളവുകളാണ്​ നിലവിലുള്ള കോവിഡ്​ വ്യാപനത്തിന്​ കാരണമെന്നും വിദഗ്​ധർ പറയുന്നു. നിലവിൽ കോവിഡ്​ വ്യാപനം പ്രതീക്ഷിച്ചതാണ്​. ഓണത്തിന്​ ശേഷം രോഗികളുടെ എണ്ണം ഉയരുമെന്ന്​ അറിയാമായിരുന്നുവെന്ന്​ ഐ.എം.എയുടെ സമൂഹമാധ്യമ വിഭാഗം നാഷണൽ കോർഡിനേറ്റർ ഡോ.സുൽഫി നൂഹ്​ പറഞ്ഞു.

എങ്കിലും നിലവിൽ ആശങ്കപ്പെടേണ്ട സാഹചര്യമില്ല. ആശുപത്രിയിൽ ചികിത്സയിലുള്ള രോഗികളുടെ എണ്ണം കുറവാണ്​. അടിയന്തര സാഹചര്യമുണ്ടായാൽ നേരിടാൻ ആരോഗ്യമേഖല സജ്ജമാണെന്നും അദ്ദേഹം പറഞ്ഞു. കഴിഞ്ഞ വർഷവും ഓണാഘോഷത്തിന്​ പിന്നാലെ സംസ്ഥാനത്ത്​ കോവിഡ്​ വ്യാപനമുണ്ടായിരുന്നു. അതേ രീതിയിൽ തന്നെയാണ്​ ഇത്തവണയും കാര്യങ്ങൾ മുന്നോട്ട്​ പോകുന്നതെന്ന്​ ആരോഗ്യവിദഗ്​ധൻ ഡോ.രാജീവ്​ ജയദേവൻ പറഞ്ഞു.

സംസ്ഥാനത്ത്​ പ്രതിദിന കോവിഡ്​ കേസുകളുടെ എണ്ണം 40,000 വരെ ഉയരാമെന്നാണ്​ ആരോഗ്യവിദഗ്​ധരുടെ മുന്നറിയിപ്പ്​. എങ്കിലും ആശുപത്രിയിൽ പ്രവേശിപ്പിക്കുന്ന രോഗികളുടെ എണം ഉയർന്നാൽ മാത്രമേ വലിയ രീതിയിലുള്ള ആശങ്കക്ക്​ സാധ്യതയു​ള്ളുവെന്നും വിദഗ്​ധർ വ്യക്​തമാക്കുന്നു. കോവിഡ്​ രോഗികളുടെ എണ്ണം ഉയർന്നതോടെ പരിശോധനയും വാക്​സിനേഷനും വർധിപ്പിക്കാൻ സംസ്ഥാന സർക്കാർ നിർദേശം നൽകിയിരുന്നു.

കഴിഞ്ഞ ദിവസം 30,000ത്തിലധികം പേർക്കാണ്​ കേരളത്തിൽ കോവിഡ്​ സ്ഥിരീകരിച്ചത്​. രാജ്യത്തെ കോവിഡ്​ രോഗികളിൽ ഭൂരിപക്ഷവും നിലവിൽ കേരളത്തിലാണ്​. നേരത്തെ ഐ.സി.എം.ആർ നടത്തിയ സിറോ സർവേയിൽ കേരളത്തിൽ 44 ശതമാനം പേരിൽ മാത്രമാണ്​ കോവിഡ്​ ആന്‍റിബോഡി കണ്ടെത്തിയത്​. ജനസംഖ്യയിൽ വലിയൊരു വിഭാഗത്തിനും ഇനിയും കോവിഡ്​ വരാനുള്ള സാധ്യതയുണ്ടെന്നാണ്​ ഇത്​ തെളിയിക്കുന്നത്​.