മനം നിറഞ്ഞ്​ കോവിഡ് ആശുപത്രിയിലെ നഴ്​സുമാർ

കൊട്ടിയം: ആറു ദിവസം ഡ്യൂട്ടി, തുടർന്നുള്ള 14 ദിവസം ക്വാറൻറീൻ. അങ്ങനെ 20 ദിവസം പുറം ലോകവുമായി ഒരു ബന്ധവുമില്ലാതെ കഴിയുക. അതു കഴിയുമ്പോൾ വീണ്ടും ഡ്യൂട്ടിയുടെ തിരക്കിൽ. ജില്ലയിലെ കോവിഡ്​ ആശുപത്രിയായ പാരിപ്പള്ളി മെഡിക്കൽ കോളജ്​ ആശുപത്രിയിലെ കോവിഡ്​ ഡ്യൂട്ടിക്കാരായ നഴ്സുമാരുടെ കഴിഞ്ഞ ദിവസങ്ങളിലെ ജീവിതചര്യയായിരുന്നു ഇത്​.

ഇൗ തീവ്ര ഡ്യൂട്ടിയുടെ പ്രയാസവും കുടുംബം തൊട്ടടുത്തുണ്ടായിട്ടും അവരെ കാണാൻ പോലുമാവാത്തതി​​​െൻറ ദുഃഖവും ഒാരോ രോഗിയും സുഖമായി, ചിരിച്ച്​, കൈവീശി, ടാറ്റാ പറഞ്ഞു പോവു​േമ്പാൾ സന്തോഷമായി മാറുകയായിരുന്നു ഇൗ നഴ്​സുമാർക്ക്​​.

അതിനു പുറമെ, ആർക്കും ജീവഹാനി സംഭവിക്കാതിരിക്കാനുള്ള ഡോക്​ടർമാരുടെ അക്ഷീണ പ്രയത്​നത്തിന്​ കൈത്താങ്ങാവാൻ കഴിഞ്ഞതി​​​െൻറ സംതൃപ്​തിയും. 85 വയസ്സുകാരിയും ഗർഭിണിയായ യുവതിയും, കൊച്ചു കുട്ടിയുമൊക്കെ, രോഗമുക്തരായി, ആശുപത്രി വിട്ടുപോകുന്നത്​ കാണു​േമ്പാൾ ഇതുമായി ബന്ധപ്പെട്ടവർ​െക്കല്ലാം ഉണ്ടായ സന്തോഷം പറഞ്ഞറിയിക്കാനാവാത്തതാണെന്നും അവർ പറയുന്നു. പി.പി.ഇ കിറ്റും, മാസ്കും, ഗൗണും ധരിച്ച് ‘പോസിറ്റിവ് ഡ്യൂട്ടി’ക്ക്​ കയറിയാൽ നാലുമണിക്കൂർ വെള്ളം പൊലും കുടിക്കാൻ കഴിയില്ല. ഇൗ ഡ്യൂട്ടി നോക്കുന്നവർ രോഗിക്ക് കൊടുക്കുന്ന ആഹാരം തന്നെയാണ് കഴിച്ചിരുന്നത്.

കോവിഡ്​ ബാധിതരെയാണ് പരിചരിക്കുന്നത് എന്നതിൽ ഒരു പേടിയും തോന്നിയിട്ടില്ല. ആതുരസേവനം കടമയും കർത്തവ്യവുമായി കണ്ടാണ് ജോലി നോക്കിയത്. കൊറോണ ബാധിതരുടെ ഇടയിലായിരുന്നു ജോലിയെങ്കിലും ആർക്കും പകർന്നില്ല എന്നത്​ മറ്റൊരു ആശ്വാസം.പാരിപ്പള്ളി മെഡിക്കൽ കോളജ്​ ആശുപത്രിയിലെ നഴ്‌സിങ്​ സൂപ്രണ്ട് വിജയലക്ഷ്​മിയും ഹെഡ് നഴ്സ് ലൂസിയും കോഴിക്കോട് സ്വദേശികളാണ്. കോഴിക്കോട് മെഡിക്കൽ കോളജിൽ ജോലിചെയ്യു​േമ്പാഴാണ്​ ‘നിപ’ബാധയുണ്ടായത്​.

അതിനാൽ ആ മുൻ അനുഭവം മുതൽക്കൂട്ടാവുകയും ചെയ്​തു. മറ്റൊരു നഴ്​സിങ്​ സൂപ്രണ്ടായ ഷീജ തൃശൂർ സ്വദേശിയാണ്. ഒരു നഴ്സസ്ദിനം കൂടി വരു​േമ്പാൾ, ഇനി ആർക്കും പോസിറ്റിവ്​ ആവരുതെന്ന പ്രാർഥനയിലാണ്​ ഇവർ. എന്നാൽ, ആരെങ്കിലും വന്നാൽ, അവരെ പരിചരിക്കാനുള്ള പൂർണ സന്നദ്ധതയിലും.