കോവിഡ്​ മരണക്കണക്ക്: പരാതി ഉണ്ടെങ്കിൽ പരിഹരിക്കുമെന്ന്​ ആരോഗ്യമന്ത്രി

തിരുവനന്തപുരം: കോവിഡ്​ മരണം സംബന്ധിച്ച പരാതികൾ ഉണ്ടെങ്കിൽ പരിഹരിക്കുമെന്ന്​ ആരോഗ്യമന്ത്രി വീണ ജോർജ്​. ഇതുവരെ പരാതികളൊന്നും ലഭിച്ചിട്ടില്ല. പരാതികൾ രേഖാമൂലം അറിയിക്കണമെന്നും ആരോഗ്യമ​ന്ത്രി ആവശ്യപ്പെട്ടു. കേരളത്തിൽ കോവിഡ്​ മരണം റിപ്പോർട്ട്​ ചെയ്​തതിൽ പിഴവുകളുണ്ടായിട്ടുണ്ടെന്ന ആരോപണങ്ങൾക്ക്​ പിന്നാലെയാണ് ഇക്കാര്യത്തിൽ​ ആരോഗ്യമന്ത്രി വീണ്ടും വിശദീകരണവുമായി രംഗത്തെത്തിയിരിക്കുന്നത്​.

കോവിഡ് മരണം സംബന്ധിച്ച​ കണക്ക്​ മനപ്പൂർവം മറച്ചുവെച്ചിട്ടില്ല. ​കോവിഡ്​ മരണം അങ്ങനെയല്ലാതെ രേഖപ്പെടുത്തിയിട്ടുണ്ടെങ്കിൽ പരിശോധിക്കും. മെഡിക്കൽ കോളജിലേയും ജില്ലകളിലേയും മരണക്കണക്കിൽ വ്യത്യാസമുണ്ടെങ്കിൽ അതും പരിശോധിക്കുമെന്നും അവർ പറഞ്ഞു. കോവിഡ്​ മരണം ആശുപത്രിയിൽ നിന്ന്​ നേരിട്ട്​ റിപ്പോർട്ട്​ ചെയ്യുകയാണ്​ ഇപ്പോൾ ചെയ്യുന്നത്​.

ജനങ്ങൾക്ക്​ പരമാവധി സഹായം ഉറപ്പാക്കാനാണ്​ സർക്കാർ ശ്രമം. മരണസർട്ടിഫിക്കറ്റിനായി ഓഫീസുകൾ കയറിയിറങ്ങേണ്ട സാഹചര്യമുണ്ടാവില്ല. ജനങ്ങഹക്ക്​ സഹായം കിട്ടുന്ന നിലപാട്​ സ്വീകരിക്കുമെന്നും ആരോഗ്യമന്ത്രി കൂട്ടിച്ചേർത്തു.