കോവിഡ്​ ബ്രിഗേഡ്​ ജീവനക്കാരെ പിരിച്ചുവിട്ടു, ഡോക്ടർമാരടക്കം രോഗികൾ; ജോലിഭാരത്തിൽ ആരോഗ്യമേഖല കിതക്കുന്നു

ആ​ല​പ്പു​ഴ: രോ​ഗ​തീ​വ്ര​ത കു​റ​ഞ്ഞെ​ങ്കി​ലും കൂ​ടു​ത​ൽ പേ​രി​ലേ​ക്ക് വ്യാ​പി​ക്കു​ന്ന കോ​വി​ഡ് മൂ​ന്നാം ത​രം​ഗ​ത്തി​ൽ പ്ര​തി​സ​ന്ധി​യാ​യി ഡോ​ക്ട​ർ​മാ​ര​ട​ക്കം ജീ​വ​ന​ക്കാ​രു​ടെ ക്ഷാ​മം.

ആ​രോ​ഗ്യ വ​കു​പ്പ്​ ജീ​വ​ന​ക്കാ​രി​ൽ പ​ല​രും കോ​വി​ഡ് പി​ടി​പെ​ട്ട് അ​വ​ധി​യി​ലാ​യ​തോ​ടെ രോ​ഗ​ബാ​ധി​ത​രു​മാ​യി സ​മ്പ​ർ​ക്ക​മു​ണ്ടാ​യി​രു​ന്ന​വ​രെ​പ്പോ​ലും ജോ​ലി​ക്ക്​ ഹാ​ജ​രാ​കാ​ൻ നി​ർ​ദേ​ശി​ക്കു​ന്ന അ​വ​സ്ഥ​യാ​ണി​പ്പോ​ൾ. ഒ​ന്നാം ത​രം​ഗ​ത്തി​ലും ര​ണ്ടാം ത​രം​ഗ​ത്തി​ലും പ്ര​തി​രോ​ധ സം​വി​ധാ​ന​ത്തി​ന്​ ക​രു​ത്താ​യി​രു​ന്ന കോ​വി​ഡ് ബ്രി​ഗേ​ഡി​ലു​ണ്ടാ​യി​രു​ന്ന ജീ​വ​ന​ക്കാ​രെ ഏ​താ​നും മാ​സം മു​മ്പാ​ണ് പി​രി​ച്ചു​വി​ട്ട​ത്. പ​ല​ർ​ക്കും ന​ൽ​കാ​നു​ള്ള വേ​ത​നം പൂ​ർ​ണ​മാ​യി ന​ൽ​കി​യി​ട്ടി​ല്ലെ​ന്ന പ​രാ​തി​യും വ്യാ​പ​ക​മാ​ണ്.

ആ​ദ്യ ര​ണ്ട്​ ത​രം​ഗ​ങ്ങ​ളി​ലും കോ​വി​ഡ് തീ​വ്ര​മ​ല്ലാ​ത്ത​വ​രെ സി.​എ​ഫ്.​എ​ൽ.​ടി.​സി​ക​ളി​ലാ​ണ് പ്ര​വേ​ശി​പ്പി​ച്ചി​രു​ന്ന​ത്. എ​ന്നാ​ൽ, പ​ല​യി​ട​ത്തും സി.​എ​ഫ്.​എ​ൽ.​ടി.​സി​ക​ൾ അ​ട​ച്ചു​പൂ​ട്ടി. ഇ​വി​ടെ​യു​ണ്ടാ​യി​രു​ന്ന ഉ​പ​ക​ര​ണ​ങ്ങ​ളും മ​റ്റും നീ​ക്കം​ചെ​യ്ത​തോ​ടെ മൂ​ന്നാം​ത​രം​ഗ​ത്തെ നേ​രി​ടാ​ൻ സൗ​ക​ര്യ​മി​ല്ലാ​താ​യി.

കോ​വി​ഡ് ബാ​ധി​ത​ർ നേ​രി​ട്ട് മെ​ഡി​ക്ക​ൽ കോ​ള​ജ് ആ​ശു​പ​ത്രി​ക​ളി​ൽ ചി​കി​ത്സ തേ​ടി​യെ​ത്താ​ൻ തു​ട​ങ്ങി​യ​തോ​ടെ ഡോ​ക്ട​ർ​മാ​രു​ൾ​പ്പെ​ടെ ആ​രോ​ഗ്യ പ്ര​വ​ർ​ത്ത​ക​ർ കോ​വി​ഡ് ബാ​ധി​ത​രാ​കു​ന്ന അ​വ​സ്ഥ​യാ​ണ്​ സം​ജാ​ത​മാ​യ​ത്.

ആ​ദ്യ ര​ണ്ട്​ ത​രം​ഗ​കാ​ല​ത്തും മെ​ഡി​ക്ക​ൽ കോ​ള​ജ് ആ​ശു​പ​ത്രി​യി​ൽ ചി​കി​ത്സ​ക്ക്​ മു​ന്നി​ട്ടു​നി​ന്ന​ത് പി.​ജി വി​ദ്യാ​ർ​ഥി​ക​ളാ​യി​രു​ന്നു. എ​ന്നാ​ൽ, അ​മി​ത​ജോ​ലി ചെ​യ്യി​ക്കു​ന്ന​തി​നാ​ൽ പ​ഠി​ക്കാ​ൻ സ​മ​യം ല​ഭി​ക്കാ​താ​യ​തോ​ടെ പി.​ജി ഡോ​ക്ട​ർ​മാ​ർ സ​മ​രം ചെ​യ്ത് ഡ്യൂ​ട്ടി​യി​ൽ​നി​ന്ന് മാ​റി​നി​ൽ​ക്കു​ന്ന സ്ഥി​തി​യു​ണ്ടാ​യി. ഈ ​സാ​ഹ​ച​ര്യ​ത്തി​ൽ മൂ​ന്നാം ത​രം​ഗ​ത്തി​ൽ പി.​ജി ഡോ​ക്ട​ർ​മാ​രു​ടെ സേ​വ​നം കു​റ​ഞ്ഞ​താ​യി ഡോ​ക്ട​ർ​മാ​ർ പ​റ​യു​ന്നു.

കോ​വി​ഡ് മൂ​ന്നാം​ത​രം​ഗം തീ​വ്ര​മാ​കു​മെ​ന്ന് ഐ.​സി.​എം.​ആ​ർ നേ​ര​ത്തെ​ത​ന്നെ മു​ന്ന​റി​യി​പ്പ്​ ന​ൽ​കി​യി​രു​ന്നെ​ങ്കി​ലും കോ​വി​ഡ് ബ്രി​ഗേ​ഡ്, സി.​എ​ഫ്.​എ​ൽ.​ടി.​സി തു​ട​ങ്ങി​യ കാ​ര്യ​ങ്ങ​ളി​ൽ​പോ​ലും മു​ൻ​ക​രു​ത​ലെ​ടു​ക്കാ​തെ ആ​രോ​ഗ്യ​വ​കു​പ്പ് വീ​ഴ്ച​വ​രു​ത്തി​യ​താ​ണ് പ്ര​തി​രോ​ധ സം​വി​ധാ​ന​ത്തി​ൽ അ​പാ​ക​ത​യു​ണ്ടാ​കാ​ൻ കാ​ര​ണ​മെ​ന്ന്​ ആ​രോ​ഗ്യ വ​കു​പ്പി​ൽ​ത​ന്നെ ആ​രോ​പ​ണം ഉ​യ​ർ​ന്നി​ട്ടു​ണ്ട്.

ല​ഭ്യ​മാ​യ ജീ​വ​ന​ക്കാ​ർ അ​മി​ത​ജോ​ലി ചെ​യ്തി​ട്ടും ആ​രോ​ഗ്യ​സം​വി​ധാ​നം ത​ള​ർ​ച്ച​യി​ലേ​ക്ക്​ നീ​ങ്ങു​ക​യാ​ണ്. മൂ​ന്നാം ത​രം​ഗ​ത്തി​ൽ മ​ര​ണം കു​റ​വ്​ റി​പ്പോ​ർ​ട്ട്​ ചെ​യ്യ​പ്പെ​ടു​ന്ന​തി​നാ​ലാ​ണ്​ ചി​കി​ത്സ നി​ഷേ​ധ​ത്തി​ന്‍റെ പേ​രി​ൽ ജ​ന​രോ​ഷം ആ​ളി​ക്ക​ത്താ​ത്ത​ത്.