സംസ്ഥാനത്ത്​ കൂടുതൽ നിയന്ത്രണം; വാക്​സിൻ സ്​റ്റോക്കുള്ളത്​ ഏഴ്​ ലക്ഷം, വേണ്ടത്​ ഒരു കോടി

തിരുവനന്തപുരം: കോവിഡിന്‍റെ രണ്ടാം തരംഗം സംസ്ഥാനത്ത്​ രൂക്ഷമാകുന്ന സാഹചര്യത്തിൽ പരിശോധനകൾ വർധിപ്പിക്കുമെന്ന്​ ചീഫ്​ സെക്രട്ടറി വി.പി ജോയ്​. ശനി, ഞായർ ദിവസങ്ങളിലായി രണ്ടര ലക്ഷത്തോളം പേർക്ക്​ ടെസ്റ്റിങ്​ നടത്തും. ഹൈ റിസ്​ക്​ വിഭാഗത്തിൽ പെടുന്നവരേയായിരിക്കും പരിശോധനക്ക്​ വിധേയമാക്കുക. വാക്​സിനേഷൻ കാമ്പയിൻ സംഘടിപ്പിക്കും. 50 ലക്ഷത്തോളം പേർക്ക്​ ഇതുവരെ വാക്​സിൻ നൽകിയിട്ടുണ്ട്​. ഏഴ്​ ലക്ഷത്തോളം പേർക്ക്​ നൽകാനുള്ള വാക്​സിൻ ബാക്കിയിട്ടുണ്ടെന്ന്​ അദ്ദേഹം പറഞ്ഞു. ടെസ്റ്റിങ്​ വാക്​സിനേഷൻ കാമ്പയിനൊപ്പം എൻഫോഴ്​സ്​മെന്‍റ്​ കാമ്പയിനും നടപ്പാക്കുമെന്നും അദ്ദേഹം കൂട്ടിച്ചേർത്തു.

അടിച്ചിട്ട സ്ഥലങ്ങളിൽ നടക്കുന്ന പൊതു പരിപാടികളിൽ പരമാവധി 75 പേരെയും തുറന്ന സ്ഥലങ്ങളിൽ 150 പേരെയും പ​ങ്കെടുപ്പിക്കാമെന്നും ചീഫ്​ സെക്രട്ടറി അറിയിച്ചു. വിദ്യാർഥികൾക്ക്​ പരീക്ഷക്കെത്താൻ കൂടുതൽ സൗകര്യമൊരുക്കും. കടകൾ ഓൺലൈൻ ഡെലിവറി കൂട്ടണം. ട്യൂഷൻ ക്ലാസുകളിൽ കോവിഡ്​ മാനദണ്ഡം കർശനമായി പാലിക്കണമെന്നും അദ്ദേഹം പറഞ്ഞു.

കല്യാണ ചടങ്ങൾക്ക്​ മുൻകൂർ അനുമതി വേണ്ട. പക്ഷേ ചടങ്ങ്​ നടക്കുന്ന വിവരം മുൻകൂട്ടി അറിയിക്കണം. തൃശൂർ പൂരം മുൻ നിശ്​ചയിച്ച പ്രകാരം നിയന്ത്രണങ്ങളോടെ നടക്കുമെന്നും ചീഫ്​ സെക്രട്ടറി അറിയിച്ചു. ​

ബസുകളിൽ നിന്നുള്ള യാത്ര അനുവദിക്കില്ല. ഒമ്പത്​ മണിക്ക്​ ശേഷം സ്ഥാപനങ്ങൾ അടക്കണമെന്ന്​ ഉത്തരവ്​ തിയറ്ററുകൾക്കും ബാറുകൾക്കും ബാധകമാണെന്നും അദ്ദേഹം പറഞ്ഞു. ഹോട്ടലുകളിൽ ഇരുന്ന്​ ഭക്ഷണം കഴിക്കുന്നത്​ ഒഴിവാക്കണം. സംസ്ഥാനത്ത്​ നിലവിൽ ലോക്​ഡൗണിന്‍റെ സാഹചര്യമില്ല. നിയന്ത്രണങ്ങൾ കർശനമായി നടപ്പാക്കിയാൽ രണ്ടാഴ്ച കൊണ്ട്​ കോവിഡ്​ നിയന്ത്രിക്കാമെന്നും അദ്ദേഹം കൂട്ടിച്ചേർത്തു.