കോവിഡ്​ 19: പത്തനംതിട്ടയിൽ 12 പേരുടെ പരിശോധന ഫലം അഞ്ചു മണിയോടെ​ -ഡി.എം.ഒ

പത്തനംതിട്ട: ജില്ലയിൽ കോവിഡ്​ 19 ഭീതിയിൽ വീടുകളിൽ നിരീക്ഷണത്തിലുള്ളവർക്ക്​ ആവശ്യമായ മരുന്ന്​ ഹെൽത്ത്​ സ​െൻററുകളിൽ നിന്ന്​ എത്തിച്ചു നൽകുമെന്ന്​ ഡി.എം.ഒ. വൈദ്യസഹായമല്ലാത്ത ആവശ്യങ്ങൾ പഞ്ചായത്തുകൾ നിർവഹിക്കും. 12 പേരുടെ പരിശോധന ഫലം വൈകീട്ട്​ അഞ്ചു മണിയോടെ ലഭിക്കുമെന്നും അവർ പറഞ്ഞു. പത്തനംതിട്ട കലക്ടറേറ്റിൽ ചേർന്ന അവലോകന യോഗത്തിനു ശേഷം മാധ്യമപ്രവർത്തകരെ കാണുകയായിരുന്നു ഡി.എം.ഒ.

വിദേശത്തു നിന്ന്​ കെറോണ വൈറസ്​ ബാധയുമായി എത്തിയ ആളുകളുമായി സമ്പർക്കം പുലർത്തിയ രണ്ടു വയസുള്ള കുട്ടിയും മാതാപിതാക്കളും പത്തനംതിട്ട ആശുപത്രിയിൽ ഐസൊലേഷനിലാണെന്ന് ഡി.എം.ഒ അറിയിച്ചു​​. ഇവരുടെ സാമ്പിൾ വൈകുന്നേരം പരിശോധനക്കയക്കും.

നിലവിൽ സാമ്പിൾ ആലപ്പുഴയിലേക്കാണ്​ അയക്കുന്നത്​. രണ്ട്​ മെഡിക്കൽ കോളജുകൾക്ക്​ കൂടി പരിശോധനക്കുള്ള അംഗീകാരം ലഭിച്ചിട്ടുണ്ട്​. അതിനാൽ ഇനി പരിശോധന ഫലം വേഗത്തിലാവും. വീടുകളിൽ നിരീക്ഷണത്തിൽ കഴിയുന്ന പലരും മാർഗ നിർദേശങ്ങൾ പാലിക്കാതെ പുറത്തിറങ്ങി നടക്കുന്നുണ്ട്​. വ്യക്തി ശുചിത്വം ഉൾപ്പെടെയുള്ള മാർഗ നിർദേശം പാലിക്കാത്തവരുമുണ്ടെന്നും ഡി.എം​.ഒ പറഞ്ഞു.

900 ആളുകളാണ്​ പത്തനംതിട്ടയിൽ വീടുകളിൽ നിരീക്ഷണത്തിലുള്ളത്​. ഇറ്റലിയിൽ നിന്നെത്തിയ കുടംബവും അവരിൽ നിന്ന്​ രോഗം പകർന്നവരുമായ ഏഴ്​ പേരുമായി നേരിട്ടും അല്ലാതെയും സമ്പർക്കം പുലർത്തിയെന്ന്​ കരുതുന്നവരാണിവർ. രോഗലക്ഷണങ്ങ​േളാടെ 28 ആളുകളാണ്​ ആശുപത്രിയിൽ ഐസൊലേഷനിലുള്ളത്​.

നേരത്തേ രോഗം സ്ഥിരീകരിച്ച അഞ്ച്​ പേരും ചൊവ്വാഴ്​ച രോഗം സ്ഥിരീകരിച്ച രണ്ട്​ പേരും ഉൾപ്പെടെ ഏഴ്​ പേർ നിലവിൽ ചികിത്സയിലാണ്​. ഇവരുടെ ആരോഗ്യനില തൃപ്​തികരമാണെന്നും ആശങ്കപ്പെടേണ്ടതില്ലെന്നും​ ഡി.എം.ഒയും ജില്ലാ കലക്​ടറും അറിയിച്ചു​.