കരാറുകാർ ഒത്തുചേർന്ന്​​ കോൺട്രാക്ടിങ്​ കമ്പനികളുണ്ടാക്കി​ കേരളത്തിലെ വൻകിട പദ്ധതികളുടെ നിർമാണം ഏറ്റെടുക്കണം -​​മന്ത്രി ബാലഗോപാൽ

തിരുവനന്തപുരം: നാലും അഞ്ചും കരാറുകാർ ഒത്തുചേർന്ന്​​ വലിയ കോൺട്രാക്ടിങ്​ കമ്പനികളുണ്ടാക്കി​ കേരളത്തിലെ വൻകിട പദ്ധതികളുടെ നിർമാണം ഏറ്റെടുക്കണ​​മെന്ന്​ ധനമന്ത്രി കെ.എൻ. ബാലഗോപാൽ. ദേശീയപാതയടക്കം കേരളത്തിലെ വൻകിട പദ്ധതികളു​ടെ നിർമാണം ഏറെയും നിലവിൽ ഏറ്റെടുക്കുന്നത്​ ഇതര സംസ്ഥാനങ്ങളിലെ കരാർ കമ്പനികളാണ്​. വലിയ കോൺട്രാക്ടിങ്​ കമ്പനികൾ രൂപവത്​കരിച്ചാൽ കേരളത്തിന്‍റെ ഭൂമിശാസ്ത്രം അറിയുന്നവർക്ക്​ തന്നെ വലിയ കരാറുകൾ കിട്ടുന്ന സാഹചര്യമുണ്ടാകും. നിർമാണവും മെച്ചമാകും. കോൺട്രാക്ടിങ്​ കമ്പനികൾക്ക്​ ലൈസൻസ്​ അനുവദിക്കുന്നതടക്കമുള്ള കാര്യങ്ങളിൽ സർക്കാറിന്‍റെ പൂർണ പിന്തുണയുണ്ടാകു​മെന്നും അദ്ദേഹം കൂട്ടിച്ചേർത്തു.

കേരള ഗവ. കോൺട്രാക്​ടേഴ്​സ്​ ഫെഡറേഷൻ 19ാം സംസ്ഥാന സമ്മേളനം ഉദ്​ഘാടനം ചെയ്യുകയായിരുന്നു മന്ത്രി. കോൺട്രാക്​ടേഴ്​സ്​ ഫെഡറേഷന്‍റെ സാമൂഹിക ക്ഷേമ പദ്ധതിയിലേക്ക്​​ നിയമവിധേയമായി ഒരു കോടി രൂപ അനുവദിക്കുമെന്നും സി, ഡി കാറ്റഗറിയിൽപെട്ട ​കരാറുകാരുടെ ലൈസൻസ് ഫീസിന്‍റെ ഡെപ്പോസിറ്റ്​ തുക കുറക്കുമെന്നും അദ്ദേഹം കൂട്ടിച്ചേർത്തു.

സംസ്ഥാന പ്രസിഡന്‍റ്​ വി. ​ജോയ്​ എം.എൽ.എ അധ്യക്ഷതവഹിച്ചു. പൊതുമരാമത്ത്​ മന്ത്രി പി.എ. മുഹമ്മദ്​ റിയാസ്​, പ്രതിപക്ഷ നേതാവ്​ വി.ഡി. സതീശൻ എന്നിവർ മുഖ്യാതിഥികളായി. ഫെഡറേഷൻ രക്ഷാധികാരി വി.​കെ.സി. മമ്മദ്​കോയ, കരമന ജയൻ, കെ.ജെ. വർഗീസ്​, പി.എം. ഉണ്ണികൃഷ്ണൻ, കാലടി ശശികുമാർ, സി. രാധാകൃഷ്ണൻ, ചീരാണിക്കര സുരേഷ്​ തുടങ്ങിയവർ സംസാരിച്ചു. ജനറൽ സെക്രട്ടറി പി.വി. കൃഷ്ണൻ പ്രവർത്തന റിപ്പോർട്ടും ട്രഷറർ പി. മോഹനൻ വരവുചെലവ്​ കണക്കും അവതരിപ്പിച്ചു.