ബ്ലേഡ് മാഫിയയുടെ ഭീഷണി; കെട്ടിട നിർമാണത്തൊഴിലാളി ജീവനൊടുക്കി

പറളി: കെട്ടിട നിർമാണത്തൊഴിലാളി വീട്ടിനുള്ളിൽ തൂങ്ങിമരിച്ചു. പറളി കിണാവല്ലൂർ അനശ്വര നഗറിൽ കാരക്കാട്ട് പറമ്പിൽ പ്രവീൺ (29) ​ആണ്​ മരിച്ചത്. ശനിയാഴ്​ച പുലർച്ചെ രണ്ടരയോടെയാണ്​ സംഭവം. ബ്ലേഡ് പലിശക്കാരുടെ ഭീഷണിയാണ്​ മരണ കാരണമെന്ന്​ ബന്ധുക്കൾ പറഞ്ഞു.

വട്ടിപ്പലിശക്കാരിൽനിന്നും പലപ്പോഴായി പ്രവീൺ പണം കടമെടുത്തിരുന്നു. തിരിച്ചടക്കാൻ കഴിയാതിരുന്നതിനാൽ പലിശ ഇരട്ടിച്ച്​ വൻ തുകയായി. വെള്ളിയാഴ്ച വൈകുന്നേരം വട്ടിപ്പലിശക്കാരനായ ഒരാൾ വീട്ടി​ലെത്തി പ്രവീണിനെ ഭീഷണിപ്പെടുത്തിയതായി വീട്ടുകാർ പറയുന്നു.

ശനിയാഴ്ച രാവിലെ ഏഴിനകം 10,000 രൂപ വീട്ടിലെത്തിക്കണമെന്നും അല്ലാത്തപക്ഷം ഭവിഷ്യത്ത്​ നേരിടേണ്ടിവരുമെന്നുമായിരുന്നു ഭീഷണി. ഇതിനുശേഷം പ്രവീൺ ആകെ അസ്വസ്ഥനായിരുന്നുവെന്നും ബ്ലേഡു​കാരന്‍റെ ഭീഷണിയിൽ മനംനൊന്താണ്​ ആത്​മഹത്യ ചെയ്തതെന്നും കുടുംബം പൊലീസിനോട്​ പറഞ്ഞു. മങ്കര പൊലീസ് ഇൻക്വസ്റ്റ് നടത്തി. മൃതദേഹം ജില്ല ആശുപത്രിയിൽ പോസ്റ്റ്​മോർട്ടത്തിനുശേഷം ബന്ധുക്കൾ ഏറ്റുവാങ്ങി സംസ്കരിച്ചു.

പിതാവ്: കാരക്കാട്ട് പറമ്പിൽ കണ്ണൻ. ഭാര്യ: രാഖി. മൂന്നു വയസ്സുകാരിയായ പ്രഖിയ, ഒന്നര വയസ്സുകാരൻ പ്രഫുൽ എന്നിവർ മക്കളാണ്.

ഞായറാഴ്ച ഭാര്യയുടേയും പിതാവിന്‍റേയും മൊഴി ​പൊലീസ്​ രേഖപ്പെടുത്തും.