പൊലീസ്​ കടകളടപ്പിക്കാൻ ശ്രമിച്ചാൽ വ്യാപാരികൾക്ക്​ കോൺഗ്രസ്​ പിന്തുണ നൽകും -കെ.സുധാകരൻ

തിരുവനന്തപുരം: വ്യാപാരികളോട്​ മുഖ്യമന്ത്രി തെരുവ്​ ഭാഷയിലാണ്​ സംസാരിക്കുന്നതെന്ന്​ കെ.പി.സി.സി പ്രസിഡന്‍റ്​ കെ.സുധാകരൻ. മുഖ്യമന്ത്രിയുടെ നാവിൽ നിന്നും വരേണ്ട വാക്കുകളല്ലത്​. ആത്​മഹത്യാ മുനമ്പിൽ നിൽക്കുന്ന വ്യാപാരികളെ വെല്ലുവിളിക്കുകയാണ്​ മുഖ്യമന്ത്രി ചെയ്യുന്നതെന്നും സുധാകരൻ പറഞ്ഞു.

നിയന്ത്രണങ്ങൾ മയപ്പെടുത്താൻ സർക്കാർ തയാറാവണം. കോൺഗ്രസ്​ എക്കാലത്തും വ്യാപാരികളോടൊപ്പമാണ്​. കടകൾ അടപ്പിക്കാൻ ശ്രമിച്ചാൽ വ്യാപാരികൾക്കൊപ്പം കോൺഗ്രസ്​ ഉണ്ടാവും. സ്​ത്രീകൾക്കെതിരായ അതിക്രമങ്ങൾക്കെതിരെ ഗവർണർ നടത്തുന്ന സമരത്തിൽ രാഷ്​ട്രീയം കാണുന്നില്ല. അതിലേക്ക്​ നയിച്ച സാഹചര്യത്തിൽ നിന്നും സർക്കാറിന്​ ഒഴിഞ്ഞ്​ മാറാനാവില്ലെന്നും സുധാകരൻ ​വ്യക്​തമാക്കി.

നേരത്തെ ഇളവുകൾ അനുവദിച്ചില്ലെങ്കിൽ വ്യാഴാഴ്ച മുതൽ കടകൾ തുറക്കുമെന്ന്​ വ്യാപാരികൾ വ്യക്​തമാക്കിയിരുന്നു. ഇതിന്​ പിന്നാലെ നിയന്ത്രണം ലംഘിച്ച്​ വ്യാപാരികൾ കട തുറന്നാൽ നേരിടാൻ അറിയാമെന്ന്​ മുഖ്യമന്ത്രി പറഞ്ഞിരുന്നു.