കോൺഗ്രസ്​ നേതാക്കൾ പറയാനുള്ളത്​ നേരിട്ട്​ പറയണം; ലേഖനമെഴുതേണ്ട -മുല്ലപ്പള്ളി

തൃശൂർ: കോൺഗ്രസിൽ ആർക്കെങ്കിലും അഭിപ്രായം പറയാനുണ്ടെങ്കിൽ നേരിട്ട് പറയണമെന്നും അല്ലാതെ ലേഖനമെഴുതുകയല്ല വേണ്ടതെന്നും കെ.പി.സി.സി പ്രസിഡൻറ്​ മുല്ലപ്പള്ളി രാമചന്ദ്രൻ. പാർട്ടി നേതാവ്​ മാത്യു കുഴൽനാടൻ നേതൃത്വത്തിന്​ കത്തെഴുതിയതുമായി ബന്ധപ്പെട്ട ചോദ്യത്തോട്​ പ്രതികരിക്കുകയായിരുന്നു അദ്ദേഹം.

മൂന്നുതവണ മത്സരിപ്പിച്ചവരെ വീണ്ടും മത്സരിപ്പിക്കരുതെന്ന് മാത്യു കുഴൽനാടന് അഭിപ്രായമുണ്ടെങ്കിൽ അത് എന്നോടാണ് പറയേണ്ടത്. ഫോണിലും ബന്ധപ്പെടാം. അല്ലെങ്കിൽ ഞാൻ വിളിച്ചാൽ ഫോണെടുക്കണം. മാത്യു കുഴൽനാട​െൻറ കത്ത് ലഭിച്ചിട്ടില്ല. തെരഞ്ഞെടുപ്പ് മുന്നിൽക്കണ്ട് ആരും മേയറുടെ കുപ്പായം സ്വയം അണിയേണ്ട. പഞ്ചായത്ത് പ്രസിഡൻറും ചമയേണ്ട. സ്ഥാനാർഥിയാണെന്ന് സ്വയം കൊട്ടിഘോഷിക്കരുത്​. സ്ഥാനാർഥി കാര്യത്തിൽ പൊളിറ്റിക്കൽ അഫയേഴ്സ് കമ്മിറ്റിയുടെ തീരുമാനമാകും അന്തിമമെന്നും മുല്ലപ്പള്ളി പറഞ്ഞു.