ട്വൻറി20യുമായി കോണ്‍ഗ്രസ് നേതാക്കളുടെ രഹസ്യചര്‍ച്ച; ഉ​മ്മ​ന്‍ ചാ​ണ്ടി​യും ചെ​ന്നി​ത്ത​ല​യും എ​ത്തി

കിഴക്കമ്പലം (കൊച്ചി): മുൻ മുഖ്യമന്ത്രി ഉമ്മന്‍ചാണ്ടിയും പ്രതിപക്ഷ നേതാവ് രമേശ് ചെന്നിത്തലയും വി.ഡി. സതീശന്‍ എം.എല്‍.എയും ഉള്‍പ്പെടുന്ന കോണ്‍ഗ്രസ് ഉന്നതതല പ്രതിനിധിസംഘം കിഴക്കമ്പലത്ത് ട്വൻറി20 ചീഫ്‌ കോഓഡിനേറ്റര്‍ സാബു എം. ജേക്കബുമായി ചര്‍ച്ച നടത്തി. ബുധനാഴ്​ച രാത്രി ഒമ്പതോടെ അദ്ദേഹത്തി​െൻറ വസതിയിലെത്തിയ ഇവർ 12 വരെ ചര്‍ച്ച നടത്തിയതായാണ്​ അറിയുന്നത്​.

പഞ്ചായത്ത് തെരഞ്ഞടുപ്പില്‍ കിഴക്കമ്പലത്തിന് പുറമേ കുന്നത്തുനാട്​ മണ്ഡലത്തിൽ മൂന്ന് പഞ്ചായത്തില്‍കൂടി ട്വൻറി20 ഭരണം പിടിച്ചെടുക്കുകയും നിയമസഭയില്‍ മത്സരിക്കുമെന്ന് പ്രഖ്യാപിക്കുകയും ചെയ്തിരുന്നു. കുന്നത്തുനാടിന് പുറമേ പെരുമ്പാവൂര്‍, എറണാകുളം, ആലുവ, അങ്കമാലി, തൃക്കാക്കര, പിറവം മണ്ഡലങ്ങളില്‍കൂടി ട്വൻറി20 മത്സരിക്കുമെന്ന് പ്രചാരണം നടക്കുന്നുണ്ട്.

ഈ സാഹചര്യത്തിലാണ് കോണ്‍ഗ്രസ്​ നേതാക്കള്‍ കിഴക്കമ്പലത്ത് നേരിട്ടെത്തിയത്. ചര്‍ച്ചയുടെ വിശദാംശങ്ങൾ അറിവായിട്ടില്ല. ചര്‍ച്ച കഴിഞ്ഞ് ഇവർ പോയശേഷമാണ് കോൺഗ്രസ്​ പ്രാദേശിക നേതാക്കൾ സംഭവം അറിയുന്നത്.