മൊട്ടയടിച്ചിട്ടും കണ്ണീരണിഞ്ഞിട്ടും കോൺഗ്രസ് മുഴുവൻ​ വനിതാ സ്ഥാനാർഥികളെയും തോൽപ്പിച്ചു

​കൊച്ചി: സീറ്റിന്​ വേണ്ടി തലമൊട്ടയടിച്ചും, കണ്ണീരണിഞ്ഞും കോൺഗ്രസിലെ വനിതകൾ ചോദിച്ചു വാങ്ങിയ സീറ്റുകളിലൊന്നിൽ പോലും ജയിപ്പിക്കാനാകാതെ കോൺഗ്രസ്​. തോൽക്കാൻ സാധ്യതയുള്ള സീറ്റ്​ നൽകിയെന്ന്​ മാത്രമല്ല, വോട്ട്​ മറിച്ചു തോൽപ്പിച്ചുവെന്ന്​ ആരോപണവും ഉയർന്നു കഴിഞ്ഞു.

കഴിഞ്ഞ നിയമസഭാ തെരഞ്ഞെടുപ്പിൽ ഒമ്പതു പേരെ കോണ്‍ഗ്രസ് സ്ഥാനാര്‍ഥിയാക്കിയെങ്കിലും ആരും ജയിച്ചില്ല. പിന്നീട്​ നടന്ന ഉപതെരഞ്ഞെടുപ്പിൽ മത്സരിച്ച​​ ഷാനിമോൾ ഉസ്​മാൻ എം.എല്‍.എ ആയി എന്നത്​ ചരിത്രം. എന്നാൽ ഇക്കുറി പേരിനൊരു കനൽ പോലുമില്ലെന്നാണ്​ കണക്കുകൾ പറയുന്നത്​.

ഇക്കുറി ഇരുപതു ശതമാനം സീറ്റില്‍ വനിതാ സ്ഥാനാര്‍ഥികള്‍ വേണമെന്ന ആവശ്യം മഹിളാ കോണ്‍ഗ്രസ് കെ.പി.സി.സി.ക്കു മുന്നില്‍ വെച്ചിരുന്നു.മഹിളാ കോണ്‍ഗ്രസ് അധ്യക്ഷ സ്ഥാനം രാജിവെച്ച ലതിക സുഭാഷിന്​ സീറ്റ്​ നിഷേധിച്ചതിനെ തുടർന്ന്​ അവർ പാർട്ടിവിടുകയും തലമുണ്ഡനം ചെയ്യുകയും ചെയ്​തിരുന്നു. പിന്നാലെ ഏറ്റുമാനൂരിൽ അവർ സ്വതന്ത്രയായി മത്സരിക്കുകയും ചെയ്​തു.

​കൊല്ലത്ത്​ മത്സരിക്കാനിരുന്ന ബിന്ദുകൃഷ്​ണക്ക്​ അവസാനനിമിഷം സീറ്റ്​ നിഷേധിച്ചുവെന്ന അഭ്യൂഹങ്ങൾ വന്നതോടെ അവർ മാധ്യമങ്ങൾക്ക്​ മുന്നിൽ പൊട്ടിക്കരഞ്ഞു. അതുകൊണ്ട്​ മാത്രമാണ്​ അവസാനം അവർക്ക്​ ആ സീറ്റ്​ ലഭിച്ചത്​. എന്നാൽ അവിടെയടക്കം മത്സരിച്ച മിക്ക വനിതകളും പരാജയത്തി​െൻറ രുചി അറിഞ്ഞു.

പാറശാലയിൽ മത്സരിച്ച കെ.പി.സി.സി സെക്രട്ടറികൂടിയായ അന്‍സജിത റസലാണ്​ പാറശാലയിൽ മത്സരിച്ചത്​. കൊട്ടാരക്കരയിൽ മത്സരിച്ച ആര്‍ രശ്മിയും, കൊല്ലത്ത്​ മത്സരിച്ച ബിന്ദു കൃ്​ഷണയും കായംകുളത്ത്​ മത്സരിച്ച അരിത ബാബുവും വൈക്കത്ത്​ മത്സരിച്ച പി ആര്‍ സോനയും, അരൂരിൽ മത്സരിച്ച ഷാനിമോൾ ഉസ്​മാനും, തൃശൂരിൽ മത്സരിച്ച പത്മജ വേണുഗോപാലും, തരൂർ മത്സരിച്ച കെ.എം ഷീബയും, മാനന്തവാടിയിൽ മത്സരിച്ച മുൻമന്ത്രി പി.കെ ജയലക്ഷമിയും വട്ടിയൂർക്കാവിലെ വീണ എസ്​ നായരും നിലംതൊടാ​െത തോറ്റവരാണ്​.

കോഴിക്കോട്​ സൗത്തിൽ മത്സരിച്ച നൂർബിന റഷീദും പരാജയത്തി​െൻറ രുചി അറിഞ്ഞതോടെ യു.ഡി.എഫിൽ വനിത എം.എൽ.എ മാർ ഇല്ലെന്ന്​ തന്നെ പറയാം.ഏറ്റുമാനുരിൽ സ്വതന്ത്രയായി മത്സരിച്ച ലതികാ സുഭാഷ്​ മൂന്നാം സ്ഥാനത്തേക്ക്​ പോവുകയും ചെയ്​തു.