വോട്ടുകച്ചവടത്തിൽ പ്രാവീണ്യം നേടിയവർ സമർഥമായി കരുക്കൾ നീക്കുന്നു -പിണറായി വിജയൻ

തൃശൂർ: വോട്ടുകച്ചവടത്തിൽ പ്രാവീണ്യം നേടിയവർ സമർഥമായി കരുക്കൾ നീക്കുന്ന തെരഞ്ഞെടുപ്പാണിതെന്ന്​ മുഖ്യമന്ത്രി പിണറായി വിജയൻ. തൃശൂർ വിദ്യാർഥി കോർണറിൽ എൽ.ഡി.എഫ്​ ​പൊതുയോഗത്തിൽ സംസാരിക്കുകയായിരുന്നു അദ്ദേഹം.

തെരഞ്ഞെടുപ്പിൽ ഇതിനായുള്ള അണിയറ നീക്കം സജീവമാണ്​. കോൺഗ്രസും ബി.ജെ.പിയും തമ്മിലെ അതിർവരമ്പ്​ നേർത്ത് വരുകയാണ്​. ഇന്ന്​ കോൺഗ്രസ്​ ആയി ജയിച്ചുവന്നാൽ അവർ നാളെ കോൺഗ്രസ്​ ആയി നിൽക്കും എന്ന്​ ആർക്കും ഉറപ്പു പറയാനാവില്ല. 35 സീറ്റ്​ കിട്ടിയാൽ സർക്കാർ രൂപവത്​കരിക്കുമെന്ന് ഒരു ബി.ജെ.പി നേതാവ്​ പറയുന്നു​. ബാക്കി സീറ്റുകൾ കോൺഗ്രസിൽ നിന്ന്​ വരും എന്നാണ്​ അയാൾ അർഥമാക്കുന്നത്​. കേരളത്തിലെ കോൺഗ്രസ്​ ബി.ജെ.പിക്ക്​ സഹായം ചെയ്​തുകൊടുത്തവരാണെന്ന്​ ബി.ജെ.പി നേതാവ്​ രാജഗോപാൽ പറഞ്ഞില്ലേ. പ്രാ​േദശികമായി ഇനിയും നീക്കുപോക്ക്​ ഉണ്ടായേക്കാമെന്നും പറഞ്ഞല്ലോ. ഇപ്പോഴും കോൺഗ്രസിന്​ ആ നിലപാട്​ സ്വീകരിക്കാൻ മടിയൊന്നുമില്ല. എക്കാലത്തും കേരളത്തിലെ കോൺഗ്രസ്​, ബി.ജെ.പിയെ തടിപ്പിക്കുന്ന നിലപാടാണ്​ സ്വീകരിച്ചിട്ടുള്ളത്​. വർഗീയതയോട്​ വിട്ടുവീഴ്​ചയില്ലാത്ത സമീപനം ഒരുകാലത്തും കോൺഗ്രസ്​ സ്വീകരിച്ചിട്ടില്ലെന്നും അദ്ദേഹം പറഞ്ഞു.

മന്ത്രി വി.എസ്​. സുനിൽകുമാർ, സി.പി.എം സംസ്​ഥാന സെക്ര​ട്ടേറിയറ്റ്​ അംഗം ബേബി ജോൺ, ഇടതുപക്ഷ സ്​ഥാനാർഥികളായ പി. ബാലചന്ദ്രൻ, മുരളി പെരുനെല്ലി, സേവ്യർ ചിറ്റിലപ്പിള്ളി, സി.സി. മുകുന്ദൻ, കെ. രാജൻ, സി.പി.എം ജില്ല സെക്രട്ടറി എം.എം. വർഗീസ്​​ എന്നിവർ സംസാരിച്ചു.