സമര പരിപാടികളിൽ നോട്ടു​മാല ധരിപ്പിക്കുന്നതിനെതിരെ പരാതി; പരാതി നൽകിയത്​ റിസർവ്​ ബാങ്കിനും പൊലീസ് മേധാവിക്കും

പാലാ: നോട്ടു​മാല തയാറാക്കുന്നതും കറൻസി നോട്ടുകളിൽ എഴുതുന്നതും റിസർവ് ​ബാങ്കിന്‍റെ ക്ലീൻ നോട്ട് പോളിസിക്ക് എതിരാണെന്ന് പരാതി. ആശ വർക്കർമാരുടെ രാപകൽ സമരയാത്രയുടെ ഭാഗമായി ജാഥ അംഗങ്ങളെ നോട്ടുമാല അണിയിക്കുന്നതിനെതിരെ പാലാ മഹാത്മ ഗാന്ധി നാഷനൽ ഫൗണ്ടേഷൻ ചെയർമാൻ എബി ജെ. ജോസാണ്​ പരാതിയുമായി രംഗത്തെത്തിയത്​.

റിസർവ്​ ബാങ്ക്, സംസ്ഥാന പൊലീസ് മേധാവി എന്നിവർക്കാണ്​ പരാതി നൽകിയത്​. കറൻസി നോട്ടുകൾ ദുരുപയോഗിക്കുന്നതിനെതിരെ 2013ൽ എബി സമർപ്പിച്ച പരാതിയെ തുടർന്നാണ് റിസർവ്​ ബാങ്ക് ക്ലീൻ നോട്ട് പോളിസിക്ക് രൂപം നൽകിയത്.

അന്ന് കെ.പി.സി.സി പ്രസിഡന്‍റായിരുന്ന രമേശ് ചെന്നിത്തല നടത്തിയ കേരളയാത്രയിൽ കറൻസി നോട്ടുകൾ നോട്ടുമാലയായി ദുരുപയോഗിക്കുന്നത് ചൂണ്ടിക്കാട്ടിയായിരുന്നു പരാതി.