സിദ്ദീഖ്​ കാപ്പ​ന്‍റെ ജീവൻ അപകടത്തിൽ, മുഖ്യമന്ത്രി ഇടപെടണം -ഐക്യദാർഢ്യ സമിതി

കോഴിക്കോട്​: മലയാളി മാധ്യമ പ്രവർത്തകൻ സിദ്ദീഖ്​ കാപ്പ​ന്‍റെ ജീവൻ സം​രക്ഷിക്കാൻ കേരള സർക്കാറും മുഖ്യമന്ത്രിയും ഉണർന്ന്​ പ്രവർത്തിക്കണമെന്ന്​ സിദ്ദീഖ്​ കാപ്പൻ ഐക്യദാർഢ്യ സമിതി ഭാരവാഹികളും കാപ്പ​ന്‍റെ കുടുംബവും വാർത്താസമ്മേളനത്തിൽ ആവശ്യപ്പെട്ടു. ആറു മാസം മുമ്പ്​ യു.എ.പി.എ പ്രകാരം അറസ്​റ്റിലായ സിദ്ദീഖ്​ കാപ്പൻ കോവിഡ്​ ബാധിച്ചതിനാൽ ആശുപത്രിയിലാണ്​.

യു.പിയിലെ ചികിത്സ അപര്യാപ്​തതകളുടെ തീക്ഷ്​ണത പുറത്തുവരുന്ന സാഹചര്യത്തിൽ സിദ്ദീഖ്​ കാപ്പ​ന്‍റെ ആരോഗ്യ സംരക്ഷണത്തിന്​ കേരള സർക്കാറും പൊതുസമൂഹവും ഉണർന്നുപ്രവർത്തിക്കണം. കേരളത്തിന്​ പുറത്ത്​ ജോലി ചെയ്യുന്ന മലയാളികൾക്ക്​ സുരക്ഷ ഉറപ്പാക്കേണ്ട ബാധ്യത കേരള സർക്കാറിനുണ്ട്​.

സിദ്ദീഖ്​ കാപ്പനും ഈ പരിഗണന അർഹിക്കുന്നതിനാൽ ഇനിയെങ്കിലും വിഷയത്തി​ന്‍റെ ഗൗരവം മനസ്സിലാക്കി മുഖ്യമന്ത്രി അടിയന്തര നടപടി സ്വീകരിക്കണമെന്നും ഭാരവാഹികൾ അഭ്യർഥിച്ചു.

സിദ്ദീഖ്​ കാപ്പ​ന്‍റെ ആരോഗ്യ കാര്യത്തിൽ കടുത്ത ആശങ്കയുണ്ടെന്ന്​ ഭാര്യ റൈഹാന പറഞ്ഞു. കടുത്ത പ്രമേഹ രോഗവും കൊളസ്​​േട്രാളും അലട്ടുന്ന സിദ്ദീഖിന്​ കോവിഡ്​ ബാധിച്ചതോടെ ആരോഗ്യം അപകടത്തിലാണ്​. സർക്കാറും രാഷ്​ട്രീയ പാർട്ടികളും പൊതുസ​മൂഹവും സിദ്ദീഖി​ന്‍റെ ജീവൻ സംരക്ഷിക്കുന്നതിൽ ഇടപെടണമെന്നും അവർ അഭ്യർഥിച്ചു.

സമിതി ചെയർപേഴ്​സൻ എൻ.പി. ചെക്കുട്ടി, കേരള പത്രപ്രവർത്തക യൂനിയൻ ജില്ല സെക്രട്ടറി പി.എസ്​. രാഗേഷ്​, സിദ്ദീഖ്​ കാപ്പ​​ന്‍റെ മക്കൾ, സഹോദരൻ ഹംസ എന്നിവരും വാർത്താസമ്മേളനത്തിൽ പ​ങ്കെടുത്തു.