കടകൾ രാത്രി 7.30 വരെ മാത്രം മതിയെന്ന്​ തറപ്പിച്ച്​ പറഞ്ഞ്​ മുഖ്യമന്ത്രി

തിരുവനന്തപുരം: സംസ്ഥാനത്ത്​ കടകൾ രാത്രി 7.30 വരെ പ്രവർത്തിച്ചാൽ മതിയെന്ന്​ തറപ്പിച്ച്​ പറഞ്ഞ്​ മുഖ്യമന്ത്രി പിണറായി വിജയൻ. രാത്രി ഒമ്പതോടെ എല്ലാ യാത്രയും നിർത്തുന്ന സ്ഥിതിവരു​േമ്പാൾ 7.30 ഒാടെ കടകൾ അടഞ്ഞുപോകുന്നതുകൊണ്ട്​ വലിയ പ്രയാസമൊന്നും വരാനില്ല. 7.30ന്​ തന്നെ കടകൾ അടഞ്ഞു പോകുന്നതാണ്​ നല്ലത്​.

എന്നാൽ, ചില ഇളവുകൾ വേണ്ട സ്ഥലത്ത്​ അത്​ അനുവദിക്കുമെന്നും അദ്ദേഹം പറഞ്ഞു. വൻകിട സൂപ്പർ മാർക്കറ്റുകൾക്കും മൾട്ടിപ്ലക്​സ്​ ഉൾപ്പെടെ തിയറ്ററുകൾക്കും മാളുകൾക്കുമാണ്​ രാത്രി 7.30 വരെ ആയി പ്രവർത്തന സമയം ചുരുക്കിയതെന്ന്​ ചൊവ്വാഴ്​ച ചീഫ്​ സെക്രട്ടറി വ്യക്തത വരുത്തിയതിനു​ പിന്നാലെയാണ്​ മുഖ്യമന്ത്രിയുടെ തിരുത്ത്​.

ശനിയും ഞായറും പൊതു അവധി നൽകിയത്​ ആളുകളുടെ ബന്ധ​െപ്പടൽ ചുരുക്കിക്കൊണ്ടുവരാനാണ്​. ഇതുമായി എല്ലാവരും സഹകരിക്കണം. കടകൾ സാധാരണ നിലക്ക്​ ഞായറാഴ്​ച പ്രവർത്തിക്കാറില്ല.

യാത്ര മുഴുവൻ തടസ്സപ്പെട്ട്​ ലോക്​​ഡൗൺ അന്തരീക്ഷം ഉദ്ദേശിക്കുന്നില്ല. നോമ്പുകാലത്ത്​ പ്രയാസം ഉണ്ടാകരുതെന്നുകണ്ട്​ ഭക്ഷണം ഒരുക്കുന്നതിൽ ക്രമീകരണം സ്വീകരിച്ചിരുന്നു. അത്​ ഇത്തവണയും തുടരും. ഹോട്ടലിൽ തന്നെ ഇരുന്ന്​ ഭക്ഷണം കഴിക്കേണ്ടതില്ല, വാങ്ങിക്കൊണ്ടുപോകാമെന്നും അദ്ദേഹം പറഞ്ഞു.