​'ആ പൂതിയൊന്നും ഏശില്ല​'; എ.ഐ കാമറ വിവാദത്തിനിടെ യു.ഡി.എഫിനെ കടന്നാക്രമിച്ച് മുഖ്യമന്ത്രി

തിരുവനന്തപുരം: എ.ഐ കാമറ അഴിമതി ഉൾപ്പടെ നിരവധി ആരോപണങ്ങൾ ഉയർന്നു വരുന്നതിനിടെ പ്രതിപക്ഷത്തെ കടന്നാക്രമിച്ച് മുഖ്യമന്ത്രി പിണറായി വിജയൻ. സംസ്ഥാന സർക്കാറിന്റെ താൽപര്യം വികസനത്തിലാണെന്ന് മുഖ്യമന്ത്രി പറഞ്ഞു. സർക്കാറിന്റെ ഈ താൽപര്യം നാട് അറിയരുതെന്ന് ചില നിക്ഷിപ്ത താൽപര്യക്കാർ ആഗ്രഹിക്കുന്നു.

സർക്കാറിനെതിരെ എന്തൊക്കെ കെട്ടിച്ചമയ്ക്കാനാകു​മെന്നാണ് അവർ നോക്കുന്നത്. അതിന് മാധ്യമങ്ങളും കൂട്ടുനിൽക്കുന്നുവെന്ന് മുഖ്യമന്ത്രി പറഞ്ഞു. സർക്കാറിന്റെ രണ്ടാം വാർഷികത്തിന്റെ നിറം കെടുത്താനാണ് ശ്രമം. ആ പൂതിയൊന്നും ഏശില്ലെന്നും മുഖ്യമന്ത്രി കൂട്ടിച്ചേർത്തു. കെട്ടിപ്പൊക്കുന്ന ആരോപണൾ ജനം വിശ്വസിക്കുമെന്ന് കരുതേണ്ടെന്നും അദ്ദേഹം കൂട്ടിച്ചേർത്തു.

യു.ഡി.എഫിനെ ഈ ദുഃസ്ഥിതിയിൽ എത്തിച്ചത് അവർ തന്നെയാണ്. ഇക്കാര്യത്തിൽ സർക്കാറിന് ഒന്നും ചെയ്യാനില്ല. വികസനം തടയാൻ യു.ഡി.എഫും ബി.ജെ.പിയും ഒരേ മാനസികാവസ്ഥയിലൊണെന്നും മുഖ്യമന്ത്രി പറഞ്ഞു.