കുട്ടനാട്ടിൽ മഹാശുചീകരണം തുടങ്ങി

ആലപ്പുഴ: കുട്ടനാടിനെ ശുചീകരിക്കാൻ സന്നദ്ധപ്രവർത്തകരിറങ്ങി. അറുപതിനായിരത്തോളം പേരാണ്​ കുട്ടനാടിനെ ശുചീകരിച്ച്​ പഴയതുപോലെയാക്കാൻ രംഗത്തെത്തിയിരിക്കുന്നത്​. ജില്ലക്ക്​ പുറത്തു നിന്നടക്കമുള്ള സന്നദ്ധ പ്രവര്‍ത്തകര്‍ ശുചീകരണ യജ്ഞത്തില്‍ പങ്കാളികളായിട്ടുണ്ട്​. കുട്ടനാട്ടിലെ 50,000പേർ, ആലപ്പുഴയിലെ 5000​ പേർ, ജില്ലക്ക്​ പുറത്തുള്ള 5000 പേർ എന്നിങ്ങനെ രജിസ്​റ്റർ ചെയ്​ത വളണ്ടിയർമാരാണ്​ മഹാശുചീകരണ യജ്​ഞത്തിൽ പങ്കാളികളാകുന്നത്​.

രണ്ടു ദിവസം കൊണ്ട്​ ശുചീകരണം പൂർത്തിയാക്കി 30ാം തീയതിക്കുള്ളിൽ നാട്ടുകാരെ തിരിച്ച്​ വീടുകളിലെത്തിക്കാനുള്ള ശ്രമത്തിലാണ്​ സർക്കാർ. മന്ത്രിമാരായ തോമസ്​ ​െഎസക്​, ജി. സുധാകരൻ, പി. തിലോത്തമൻ എന്നിവരാണ്​ ശുചീകരണത്തിന്​ നേതൃത്വം നൽകുന്നത്​. 

കൈനകരി, പുളിങ്കുന്ന്, കാവാലം, ചമ്പക്കുളം, നെടുമുടി എന്നീ പഞ്ചായത്തുകളിൽ ശുചീകരണത്തിനായി​ ആളുകളെ ബോട്ടു മാർഗം എത്തിച്ചു. നീലംപേരൂർ, രാമങ്കരി, മുട്ടാർ, തകഴി, ചെറുതന, കരുവാറ്റ, പള്ളിപ്പാട്, വെളിയനാട്, തലവടി, വീയ്യപുരം, എടത്വാ, പഞ്ചായത്തുകളിലേക്കുള്ളവർ റോഡ് മാര്‍ഗവും യാത്ര തിരിച്ചിട്ടുണ്ട്​.

ഉൾഭാഗങ്ങളിൽ ആവശ്യമെങ്കിൽ ബോട്ടുകളും ഏർപ്പെടുത്തും. 22 ടോറസ് ലോറികൾ, 38 ബസുകൾ, 500 ഹൗസ് ബോട്ടുകൾ, 50 മോട്ടോർ ബോട്ടുകൾ, 20 ശിക്കാര വള്ളങ്ങൾ, 20 കെട്ടുവള്ളങ്ങൾ, 10 സ്പീഡ് ബോട്ടുകൾ, 4 ജങ്കാറുകൾ എന്നിവയാണ് ഇതിനായി ജില്ലാ ഭരണകൂടം തയ്യാറാക്കിയിരിക്കുന്നത്.

എസി റോഡിലെയും കൈനകരി, ചമ്പക്കുളം, കാവാലം പഞ്ചായത്തുകളിലെ വിവിധ ഭാഗങ്ങളിലെയും വെള്ളം വറ്റിക്കാന്‍ കഴിയാത്തത് ശുചീകരണ പ്രവര്‍ത്തനങ്ങളെ പ്രതികൂലമായി ബാധിക്കുമെന്ന ആശങ്കയുണ്ട്.