നിയമസഭയിൽ തട്ടിവീണ്​ ആശ എം.എൽ.എക്ക്​ പരിക്ക്​

തിരുവനന്തപുരം: നിയമസഭയിൽനിന്ന് പുറത്തേക്കിറങ്ങുന്നതിനിടെ സാരിത്തുമ്പിൽ തട്ടിവീണ് വൈക്കം എം.എൽ.എ സി.കെ. ആശക്ക്​ പരിക്ക്. മെഡിക്കൽ കോളജ് ആശുപത്രിയിൽ ചികിത്സതേടി. ഡോക്ടർമാർ രണ്ടാഴ്ച വിശ്രമം നിർദേശിച്ചു. ഇടതുകാലിലെ ലിഗമ​െൻറിനാണ് പരിക്ക്.

ചൊവ്വാഴ്​ച ധനവിനിയോഗ ബില്ലി​​െൻറ ചർച്ചയിൽ പങ്കെടുത്ത് ഐ.ബി. സതീഷ് സംസാരിക്കുന്നതിനിടെ ഉച്ചക്ക്​ 1.45ഒാടെയാണ്​ സംഭവം. ത​​െൻറ മണ്ഡലത്തിൽനിന്ന് എത്തിയവരെ കാണാൻ പുറത്തേക്ക് ധൃതിയിൽ ഇറങ്ങുമ്പോഴായിരുന്നു വീഴ്ച. ഭരണ-​പ്രതിപക്ഷാംഗങ്ങൾ ഒാടിയെത്തി ആശയെ എഴുന്നേൽപിച്ചു. സീറ്റിൽ ഇരുത്തിയപ്പോഴേക്കും തലചുറ്റൽ അനുഭവപ്പെട്ടു. അതോടെ സഭാനടപടികൾ നിർത്തി​െവച്ചു.

സഭയിൽ ഡ്യൂട്ടിയിലുണ്ടായിരുന്ന ഡോക്ടർ എം.എൽ.എയെ പരിശോധിച്ചു. തുടർന്നാണ് ആശുപത്രിയിലേക്ക് കൊണ്ടുപോയത്. ഇതുമൂലം സഭാനടപടികൾ അഞ്ച്​ മിനിട്ടോറ്റോളം നിലച്ചു. പ്രാഥമിക ശുശ്രൂഷകൾക്കുശേഷം ആശ എം.എൽ.എ ഹോസ്​റ്റലിനോട് ചേർന്ന ഫ്ലാറ്റിൽ തിരിച്ചെത്തി.

ഈ സമ്മേളനകാലത്ത് സഭയിൽ വീഴുന്ന മൂന്നാമത്തെ എം.എൽ.എയാണ് ആശ. ദിവസങ്ങൾക്ക്​ മുമ്പ്​ പ്രതിപക്ഷ ബഞ്ചിനിടയിലെ വഴിയിലൂടെ പുറത്തേക്കിറങ്ങാൻ ശ്രമിക്കുമ്പോൾ മുതിർന്ന അംഗം സി.കെ. നാണു കാൽ തട്ടി വീണതാണ് ആദ്യസംഭവം. കഴിഞ്ഞയാഴ്​ച​ പ്രധാന വാതിൽ വഴി പുറത്തേക്കിറങ്ങാൻ ശ്രമിച്ചപ്പോൾ എസ്. ശർമ വീണു. സഭക്കുള്ളിലെ തറയിൽ വിരിച്ച പരവതാനിയും പടിയും തമ്മിൽ വേർതിരിച്ചറിയാനാകാത്തതാണ്​ അപകടങ്ങൾക്ക്​ കാരണം.