സഭ തർക്കം: കോടതി ഉത്തരവ്​ നടപ്പാക്കുന്നതിൽ അലംഭാവവും പക്ഷപാതിത്വവും ഇ​ല്ലെന്ന്​ സർക്കാർ

കൊച്ചി: സഭ തർക്കവുമായി ബന്ധപ്പെട്ട സുപ്രീംകോടതി ഉത്തരവ്​ നടപ്പാക്കുന്നതിൽ അലംഭാവം കാട്ടിയിട്ടില്ലെന്ന്​ സംസ്​ഥാന സർക്കാർ ഹൈകോടതിയിൽ. ഏതെങ്കിലും ഒരു വിഭാഗത്തോട്​ പക്ഷപാതപരമായ ഉദാര സമീപനം പുലർത്തിയിട്ടുമില്ല. ക്രമസമാധാനം ഉറപ്പുവരുത്തിയശേഷം പല പള്ളികളുടെയും നിയന്ത്രണം നിയമപ്രകാരമുള്ള വികാരിമാർക്ക്​ കൈമാറിയിട്ടുണ്ട്​.

മറ്റ്​ പള്ളികളുടെ കാര്യത്തിലും കോടതി നിർദേശം പാലിക്കാൻ തയാറാണ്. എന്നാൽ, കോവിഡ് വ്യാപനം ഇതിന്​ തടസ്സമുണ്ടാകുന്നുണ്ട്​. പള്ളികൾ നിർബന്ധപൂർവം കൈമാറാൻ ശ്രമിച്ചാൽ കോവിഡ് പ്രോട്ടോക്കോൾ ലംഘിച്ച്​ ജനക്കൂട്ടമുണ്ടായേക്കും.​ സാഹചര്യം അനുകൂലമാകുമ്പോൾ ഘട്ടംഘട്ടമായി ക്രമസമാധാന പ്രശ്നങ്ങളില്ലാതെ ഉത്തരവ്​ നടപ്പാക്കാനാവും.

യാക്കോബായ സഭാംഗങ്ങൾക്ക്​ ഭൂരിപക്ഷമുള്ള ഇടവകകളിൽ ​അവരുടെ വിഭാഗക്കാരുടെ സംസ്​കാര ചടങ്ങുകൾക്ക്​ ഓർത്തഡോക്സ് സഭ വൈദികർ എത്തുന്നതും മറ്റും സംഘർഷത്തിനിടയാക്കുന്നുണ്ട്​.

എറണാകുളം വടവുകോട് സെൻറ്​ മേരീസ് പള്ളിയിലെ ചടങ്ങുകൾക്കും പ്രാർഥനക്കും സംരക്ഷണം തേടി ഒാർത്തഡോക്സ് സഭ വികാരി ഫാ. കുര്യാക്കോസ് തണ്ണിക്കോട്ടും മറ്റു ചിലരും നൽകിയ ഹരജിയിലാണ് സർക്കാറി​െൻറ വിശദീകരണം.

2019 മുതൽ ഈ പള്ളി 1934ലെ സഭ ഭരണഘടനയനുസരിച്ച്​ ഭരിക്കപ്പെടുന്നതാണെന്ന്​ സർക്കാറി​ന്​ വേണ്ടി അഡീ. അഡ്വക്കറ്റ്​ ജനറൽ അറിയിച്ചു. സംഘർഷ സാധ്യത ഒഴിവാക്കി വേണം കോടതിവിധി നടപ്പാക്കാൻ. ഇത്​ ഘട്ടം ഘട്ടമായി നടപ്പാക്കാനാവുമെന്നും സർക്കാർ വ്യക്​തമാക്കി.

സഭ വിഷയത്തിൽ സുപ്രീംകോടതി വിധി നടപ്പാക്കൽ സർക്കാറി​െൻറ ബാധ്യതയാണെന്ന്​ കോടതി നേരത്തേ നിരീക്ഷിച്ചിരുന്നു. പള്ളിത്തർക്കവുമായി ബന്ധപ്പെട്ട ഹരജികൾ ഒക്​ടോബർ അഞ്ചിന്​ പരിഗണിക്കാൻ ജസ്​റ്റിസ്​ ദേവൻ രാമചന്ദ്രൻ മാറ്റി.