കേരള ചീഫ്​ സെക്രട്ടറിയെ ജയിലിലയക്കേണ്ടിവരും -സുപ്രീംകോടതി

ന്യൂഡൽഹി: സഭാ തർക്കത്തിൽ ഒാർത്തഡോക്​സ് സഭക്ക്​ അനുകൂലമായി പുറപ്പെടുവിച്ച സുപ്രീംകോടതി വിധി നടപ്പാക്കാത് തതിന്​ കേരള ചീഫ്​ സെക്രട്ടറിയെ ജയിലില​യക്കേണ്ടി വരുമെന്ന്​ സുപ്രീംകോടതി മുന്നറിയിപ്പ്​. കോടതിയലക്ഷ്യത്തിന്​ ബിഹാർ ചീഫ്​ സെക്രട്ടറിയെ ജയിലിലയച്ചത്​ ഒാർമിപ്പിച്ച ജസ്​റ്റിസ്​ അരുൺ മിശ്ര കേരളം നിയമത്തിന്​ മുകളിലാണോ എന്ന്​ ചോദിച്ചു. തങ്ങൾക്കെതിരായ കേരള ഹൈകോടതി വിധിക്കെതിരെ ഒാർത്തഡോക്​സ്​ വിഭാഗം സമർപ്പിച്ച രണ്ട്​ പ്രത്യേകാനുമതി ഹരജികൾ തീർപ്പാക്കി ഇൗ വിഷയത്തിൽ സുപ്രീംകോടതി വിധി നടപ്പാക്കാനും ബെഞ്ച്​ ഉത്തരവിട്ടു.

പള്ളി തർക്കങ്ങളുമായി ബന്ധപ്പെട്ട്​ സുപ്രീംകോടതി 20​17ലും 2018ലും പുറപ്പെടുവിച്ച വിധി നടപ്പാക്കുന്നതിന്​ പൊലീസ്​ സംരക്ഷണം ആവശ്യപ്പെട്ട്​ ഓർത്തഡോക്‌സ് വിഭാഗം രണ്ട്​ റിട്ട്​ ഹരജികളുമായി ഹൈകോടതിയെ സമീപിച്ചിരുന്നു. കഴിഞ്ഞ മാർച്ചിൽ കേരള ഹൈകോടതി വിശ്വാസികളുമായി ബന്ധപ്പെട്ട് ക്രമസമാധാന പ്രശ്നങ്ങൾ ഉണ്ടെങ്കിൽ പൊലീസിനെ സമീപിക്കാമെന്നും സ്ഥിരം ​പൊലീസ് സുരക്ഷ നൽകാനാകില്ലെന്നും വ്യക്തമാക്കി. അതോടൊപ്പം ഹൈകോടതി 2017ലെ സുപ്രീംകോടതി വിധിയിൽ വ്യക്തതവരുത്തുകയും ചില നിർദേശങ്ങൾ നൽകുകയും ചെയ്​തു. മലങ്കര ചർച്ചിലെ അംഗങ്ങൾ മരിച്ചു കഴിഞ്ഞാൽ അടക്കം ചെയ്യുന്നതടക്കമുള്ള കാര്യങ്ങളിലാണ്​ നിർദേശങ്ങൾ നൽകിയത്​.
എന്നാൽ, സുപ്രീംകോടതി വിധിയിൽ വ്യക്തത വരുത്താൻ കേരള ഹൈകോടതിക്ക്​ അധികാരമില്ലെന്നും അത്​ സുപ്രീംകോടതിയാണ്​ ചെയ്യേണ്ടതെന്നും ചുണ്ടിക്കാട്ടി കേരള ഹൈകോടതി പുറപ്പെടുവിച്ച വിധിക്കെതിരെ ഒാർത്തഡോക്​സ്​ സഭ അഡ്വ. സദ്​റുൽ അനാം മുഖേന സുപ്രീംകോടതിയിലെത്തുകയായിരുന്നു.

കേസ്​ പരിഗണിച്ചപ്പോൾ തന്നെ കേരള സർക്കാറിനു വേണ്ടി ഹാജരായ അഭിഭാഷകൻ ജയദീപ്​ ഗുപ്​തയെ വാദിക്കാൻ പോലും അനുവദിക്കാതെയാണ്​ ജസ്​റ്റിസ്​ അരുൺ മിശ്ര പൊട്ടിത്തെറിച്ചത്​. സംസ്​ഥാന സർക്കാർ ചെയ്യുന്നത്​ ഗുരുതരമായ കോടതിയലക്ഷ്യമാണെന്നും അംഗീകരിക്കാനാകില്ലെന്നും ജസ്​റ്റിസ്​ മിശ്ര വ്യക്തമാക്കി. ആദ്യം മൂന്നംഗ ബെഞ്ചും പിന്നീട് രണ്ടംഗ ബെഞ്ചും വിധി പുറപ്പെടുവിച്ച കേസാണിത്​. ഒരു കോടതിക്കും ഇതിലിനി ഇടപെടാനാകില്ല. ഇതിനകം കോടതിയലക്ഷ്യം പ്രവർത്തിച്ചു. സുപ്രീം കോടതി വിധി നടപ്പാക്കുന്നത് വൈകിപ്പിക്കാനാണ്​ ശ്രമം. അത്​ തുടരാൻ അനുവദിക്കില്ല. കേരള ചീഫ് സെക്രട്ടറിയെ ഇവിടെ വിളിച്ചുവരുത്തി നേരെ ജയിലിലയക്കും. വിളിച്ചുവരുത്താൻ പോകുകയാണെന്ന്​ മുന്നറിയിപ്പ്​ നൽകിയ ജസ്​റ്റിസ്​ മിശ്ര കേരളം നിയമത്തിന് മുകളിലാണോ എന്ന്​ ചോദിച്ചു. ബിഹാർ ചീഫ് സെക്രട്ടറിക്ക് സംഭവിച്ചത് ആരെങ്കിലും അദ്ദേഹത്തിന്​ പറഞ്ഞു കൊടുക്കണം.

1959 മുതൽ തുടങ്ങിയ കേസ്​ ദീർഘകാലം കേട്ടാണ്​ വിധി പുറപ്പെടുവിച്ചത്​. രണ്ടാമത്തെ വിധിയിൽ എല്ലാം വ്യക്തമായിട്ടും പത്തോളം റിട്ട് പെറ്റിഷനുകൾ വീണ്ടും എത്തിയത്​ എന്തുകൊണ്ടാണെന്ന്​ ജസ്​റ്റിസ്​ മിശ്ര ചോദിച്ച​ു. ചീഫ് സെക്രട്ടറി​െക്കതിരെ കോടതിയലക്ഷ്യ നോട്ടീസ് അയക്കാനുള്ള ഉത്തരവിലേക്ക്​ കടക്കാനിരിക്കേ ജയദീപ് ഗുപ്‌തയുടെ അപേക്ഷ മാനിച്ച്​ കോടതി ​ പിന്മാറി. സുപ്രീം കോടതി വിധി നടപ്പാക്കാൻ നിർദേശിച്ച്​ ഹരജി തീർപ്പാക്കി.