കുട്ടി കാനയിൽ വീണ സംഭവം:​ നഗരസഭ സെക്രട്ടറിയെ വിളിച്ചു വരുത്തി; കാനകൾ രണ്ടാഴ്ചക്കകം മൂടണമെന്ന്​ ഹൈകോടതി

കൊച്ചി: നഗരത്തിൽ തുറന്നുകിടന്ന കാനയിൽ വീണ്​ മൂന്ന്​ വയസ്സുകാരന്​ പരിക്കേറ്റ സംഭവത്തിൽ സ്വമേധയ ഇടപെട്ട ഹൈകോടതി, കൊച്ചി കോർപറേഷൻ സെക്രട്ടറിയെ വിളിച്ചുവരുത്തി. വിഷയം അമിക്കസ്​ ക്യൂറി ശ്രദ്ധയിൽപെടുത്തിയതിനെ തുടർന്ന്​ വെള്ളിയാഴ്ച രാവിലെ ഇക്കാര്യം പരിഗണിച്ച ജസ്റ്റിസ്​ ദേവൻ രാമചന്ദ്രൻ ഉച്ചക്ക്​ ശേഷം നഗരസഭ സെക്രട്ടറി ഹാജരാവണമെന്ന നിർദേശം നൽകി. നേരിട്ട്​ ഹാജരായ സെക്രട്ടറി ബാബു അബ്ദുൽ ഖാദർ, അപകടക്കെണിയൊരുക്കി തുറന്നുകിടക്കുന്ന കാനകളും കുഴികളും രണ്ടാഴ്ചക്കകം സ്ലാബിട്ട്​ അടക്കുമെന്നും ഇത്​ സാധ്യമല്ലാത്തിടങ്ങളിൽ ശരിയായ രീതിയിൽ ബാരിക്കേഡ്​ സ്ഥാപിച്ച് സുരക്ഷ ഉറപ്പാക്കുമെന്നും കോടതിക്ക്​ ഉറപ്പുനൽകി.

ഒക്​ടോബർ 12ന്​ മാത്രമാണ്​ താൻ ചുമതലയേറ്റതെന്ന്​ പറഞ്ഞ സെ​ക്രട്ടറി, സംഭവത്തിൽ മാപ്പ്​ പറയുകയും ചെയ്​തു. ഇതു രേഖപ്പെടുത്തിയ സിംഗിൾ ബെഞ്ച് വിഷയം ഡിസംബർ രണ്ടിന്​ വീണ്ടും പരിഗണിക്കാൻ മാറ്റി. വ്യാഴാഴ്ച രാത്രി എട്ടോടെ പനമ്പിള്ളി നഗർ മെയിൻ അവന്യൂ റോഡിന്​ സമീപത്തെ കാനയിലാണ്​ മൂന്നു വയസ്സുകാരൻ വീണത്​.

സംഭവം ഞെട്ടിപ്പിക്കുന്നതാണെന്നും ദൈവാനുഗ്രഹം കൊണ്ടാണ് കാര്യമായ പരിക്കില്ലാതെ കുട്ടി രക്ഷപ്പെട്ടതെന്നും കോടതി അഭിപ്രായപ്പെട്ടു. കൊച്ചിയിൽ മാത്രമല്ല, സംസ്ഥാനത്തെ മിക്ക നഗരങ്ങളിലും കാനകളും കുഴികളും അപകടക്കെണിയൊരുക്കി തുറന്നുകിടക്കുന്നത് സാധാരണ കാഴ്ചയാണ്. സംഭവത്തിന്‍റെ അന്തിമ ഉത്തരവാദിത്തം കോർപറേഷനാണ്​. നടപ്പാതകൾ സുരക്ഷിതമാക്കണമെന്ന്​ നാളുകളായി പറയുന്നു. സ്ലാബിടാനും ബാരിക്കേഡ്​ സ്ഥാപിക്കാനും അപകടം സംഭവിക്കാൻ കാത്തിരിക്കുന്നതെന്തിനാണെന്ന്​ കോടതി ചോദിച്ചു​.

എറണാകുളം എം.ജി റോഡിൽ നടപ്പാതകൾ തുറന്നിട്ടിരിക്കുകയാണ്. കാൽനട തീർത്തും അസാധ്യമാണ്​. ഇവിടങ്ങളിൽ ബാരിക്കേഡുകൾപോലും സ്ഥാപിക്കുന്നില്ല. റോഡും നടപ്പാതകളും കുട്ടികൾക്കുകൂടി സഞ്ചരിക്കാനുള്ളതാണ്​. അവരെകൂടി കരുതി വേണം നടപടി​കൾ. സൈക്കിളോടിക്കാൻ നഗരത്തിലെ റോഡിലിറങ്ങുന്ന കുട്ടികൾ മടങ്ങിവരുന്നത് ഭാഗ്യംകൊണ്ടാണ്. കാനകളും കുഴികളും അപകടക്കെണിയാവുമ്പോൾ ജില്ല ദുരന്ത നിവാരണ അതോറിറ്റിയുടെ ചുമതലയുള്ള കലക്ടറും ശ്രദ്ധിക്കണം.

നഗരസഭ സെക്രട്ടറി നൽകിയ ഉറപ്പ്​ രണ്ടാഴ്ചക്കകം പാലിക്കണമെന്ന്​ കോടതി നിർദേശിച്ചു. സെക്രട്ടറി, നഗരത്തിലെ വെള്ളക്കെട്ട്​ പരിഹരിക്കണമെന്ന ഹരജിയിൽ ഹൈകോടതി നിയോഗിച്ച മേൽനോട്ട സമിതി എന്നിവയുമായി ചേർന്ന് കലക്ടർ പ്രവർത്തനങ്ങൾ നിരീക്ഷിക്കണം. നടപ്പാതകളുടെ സുരക്ഷ ഓഡിറ്റ് നടത്തി റിപ്പോർട്ട് ഡിസംബർ രണ്ടിനകം നൽകാനും കോടതി ആവശ്യപ്പെട്ടു.