ശബരിമലയോട് മുഖ്യമന്ത്രിക്ക്​ അലർജി -രമേശ് ചെന്നിത്തല

പത്തനംതിട്ട: ശബരിമലയോട് മുഖ്യമന്ത്രി പിണറായി വിജയനുള്ള അലർജി ഇപ്പോഴും നിലനിൽക്കുകയാണെന്ന് കോൺഗ്രസ് പ്രവർത്തക സമിതി അംഗം രമേശ് ചെന്നിത്തല. പത്തനംതിട്ട നഗരസഭ ഇടത്താവളത്തിൽ അയ്യപ്പ ഭക്തർക്കായുള്ള ക്രമീകരണങ്ങൾ വിലയിരുത്താനെത്തിയതായിരുന്നു അദ്ദേഹം.

തീർഥാടന​ത്തോട് ഇടതുസർക്കാർ അനാദരവും അവഗണനയും തുടരുകയാണ്. ദേവസ്വം ബോർഡും പൊലീസും തമ്മിലെ ശീതസമരമാണ് ശബരിമലയിൽ സ്ഥിതിഗതി രൂക്ഷമാക്കിയത്​. ഭക്ഷണവും വെള്ളവും ലഭിക്കാതെ പത്തും ഇരുപതും മണിക്കൂർ ഭക്തർക്ക് ദർശനത്തിന്​ കാത്തുനിൽക്കേണ്ടിവരുന്നു. മുന്നൊരുക്കങ്ങളിൽ സർക്കാർ പൂർണമായി പരാജയപ്പെട്ടു.

പരിചയസമ്പന്നരായ പൊലീസ് ഉദ്യോഗസ്ഥരെ ഡ്യൂട്ടിക്ക് ​നിയോഗിക്കണം. ദേവസ്വം മന്ത്രി അടിയന്തരമായി ശബരിമലയിൽ എത്തണം. ദേവസ്വം ബോർഡും പൊലീസും വിവിധ വകുപ്പുകളും ഒരുമിച്ചുനിന്ന് മണ്ഡലകാല മകരവിളക്ക് തീർഥാടനം സുഗമമാക്കാൻ അടിയന്തര നടപടി സ്വീകരിക്കണമെന്നും ചെന്നിത്തല ആവശ്യപ്പെട്ടു.