മുൻമന്ത്രി ചെർക്കളം അബ്‌ദുല്ല അന്തരിച്ചു

കാസർകോട്: മുൻമന്ത്രിയും മുസ്‌ലിം ലീഗ് ദേശീയ നിർവാഹകസമിതി അംഗവും സംസ്ഥാന ട്രഷററുമായ ചെർക്കളം അബ്‌ദുല്ല (76) അന്തരിച്ചു. വെള്ളിയാഴ്​ച രാവിലെ 8.20ന്​ ചെർക്കളയിലെ ‘കംസാനക്ക് വില്ല’യിലായിരുന്നു​ അന്ത്യം. വാർധക്യസഹജമായ അസുഖത്തെ തുടർന്ന്​ ഏതാനും നാളുകളായി മംഗളൂരു കസ്​തൂർബ മെഡിക്കൽ കോളജ്​ ആശുപത്രിയിൽ ചികിത്സയിലായിരുന്നു. വ്യാഴാഴ്​ച വൈകീ​േട്ടാടെയാണ്​ ചെർക്കളയിലെ വീട്ടിൽ കൊണ്ടുവന്നത്​​. വെള്ളിയാഴ്​ച വൈകീട്ട് ചെർക്കള മുഹ്​യിദ്ദീൻ ജുമാമസ്​ജിദ്​ ഖബർസ്ഥാനിൽ ഒൗദ്യോഗിക ബഹുമതികളോടെ ഖബറടക്കി.  

2001 മുതൽ 2004വരെ എ.കെ. ആൻറണി മന്ത്രിസഭയിൽ തദ്ദേശ സ്വയംഭരണ മന്ത്രിയായിരുന്നു. 1987 മുതൽ 2006വരെ നാലുതവണ മഞ്ചേശ്വരം മണ്ഡലത്തിൽനിന്ന്​ എം.എൽ.എയായി. മുഖ്യമന്ത്രി എ.കെ. ആൻറണിയുടെ ന്യൂനപക്ഷവിരുദ്ധ പ്രസംഗത്തെ തുടർന്ന്​ വീണ മന്ത്രിസഭ​െക്കാപ്പം ചെർക്കളത്തിനും മന്ത്രിസ്ഥാനം നഷ്​ടമായി. ദാരിദ്ര്യനിർമാർജന രംഗത്ത് വിപ്ലവകരമായ മാറ്റമുണ്ടാക്കിയ ‘കുടുംബശ്രീ’ പദ്ധതി വ്യാപകമാക്കിയത്​ ചെർക്കളം മന്ത്രിയായിരിക്കെയാണ്​. തദ്ദേശസ്ഥാപനങ്ങൾക്ക്​ ഏറ്റവും കൂടുതൽ ഫണ്ട് നൽകിയതും ഉദ്യോഗസ്ഥതലത്തിൽ പുനർവിന്യാസവും പെർഫോമൻസ് ഓഡിറ്റ് സംവിധാനം നടപ്പാക്കിയതും തദ്ദേശസ്ഥാപനങ്ങളുടെ പ്രവർത്തനം കാര്യക്ഷമമാക്കിയതും ആശ്രയ പദ്ധതിയും മന്ത്രിയെന്നനിലയിൽ ചെർക്കളത്തി​​​െൻറ ശ്രദ്ധേയനീക്കങ്ങളായിരുന്നു. കൊച്ചിയിലെ മൂന്നു ദ്വീപുകളെ ബന്ധിപ്പിക്കുന്ന ഗോശ്രീ  പാലങ്ങൾ പൂർത്തിയാക്കിയത്​​ ​െചർക്കളത്തി​​​െൻറ നിശ്ചയദാർഢ്യത്തി​​​െൻറ ഫലമാണ്​. നിരവധി വികസന അതോറിറ്റികളുടെ പ്രവർത്തനം കാര്യക്ഷമമാക്കി.

1942 സെപ്​റ്റംബർ 15ന്​ ബാരിക്കാട്​ മുഹമ്മദ്​ ഹാജിയുടെയും ആസ്യമ്മയുടെയും മകനായി ജനനം. എടനീർ സ്​കൂളിൽനിന്ന്​ 10ാംതരം​ പൂർത്തിയാക്കിയ ചെർക്കളം രാഷ്​ട്രീയത്തിലും ബിസിനസിലും ഒരേസമയം ശ്രദ്ധകേന്ദ്രീകരിച്ചു. എന്നാൽ, രാഷ്​​്ട്രീയമാണ്​ വഴിതിരിച്ചുവിട്ടത്​. 1957ൽ സ്വതന്ത്ര വിദ്യാർഥി സംഘടന (​െഎ.എസ്​.ഒ) നേതാവായിരുന്നു.1958ൽ ചെർക്കള ശാഖ ലീഗ്​ സെക്രട്ടറിയായാണ്​ തുടക്കം.  1959ൽ യൂത്ത് ലീഗ് കണ്ണൂര്‍ ജില്ല സെക്രട്ടറി, മുസ്​ലിം ലീഗ് കണ്ണൂര്‍ ജില്ല സെക്രട്ടറി, മുസ്​ലിം യൂത്ത് ലീഗ് ഭരണഘടന സമിതിയംഗം, യു.ഡി.എഫ് കണ്ണൂര്‍ ജില്ല ജോയൻറ്​ കണ്‍വീനര്‍, 2004 മുതൽ 2017വരെ മുസ്​ലിം ലീഗ് കാസര്‍കോട് ജില്ല പ്രസിഡൻറ്​, സെക്ര​േട്ടറിയറ്റ് മെംബര്‍, യു.ഡി.എഫ് കാസർകോട്​ ജില്ല ചെയർമാൻ, സംയുക്ത മുസ്​ലിം ജമാഅത്ത് കാസര്‍കോട് ജില്ല കോഓഡിനേഷന്‍ ചെയർമാൻ, സുന്നി മഹല്ല് ഫെഡറേഷന്‍ ജില്ല പ്രസിഡൻറ്​, സംസ്​ഥാന ന്യൂനപക്ഷ വികസന ഫിനാന്‍സ് കോര്‍പറേഷന്‍ ചെയർമാൻ, നിയമസഭ പിന്നാക്കസമുദായ ക്ഷേമസമിതി ചെയർമാൻ, എസ്.ടി.യു സംസ്ഥാന പ്രസിഡൻറ്​  എന്നിങ്ങനെ നിരവധി പദവികൾ വഹിച്ചു. നിരവധി ട്രസ്​റ്റുകളുടെ ചെയർമാൻകൂടിയായിരുന്നു.  

ഭാര്യ: ആയിഷ ചെര്‍ക്കളം (മുന്‍ പ്രസിഡൻറ്,​ ചെങ്കള ഗ്രാമപഞ്ചായത്ത്). മക്കൾ: സി.എ. മുഹമ്മദ് നാസര്‍ (മസ്‌കത്ത്​), സി.എ. മെഹറുന്നിസ (മും​െബെ), സി.എ. മുംതാസ് സമീറ (കാസര്‍കോട് ജില്ല പഞ്ചായത്ത് അംഗം), സി.എ. അഹമ്മദ് കബീര്‍ (എം.എസ്.എഫ് മുന്‍ ജില്ല പ്രസിഡൻറ്​). മരുമക്കള്‍: എ.പി. അബ്​ദുൽ ഖാദര്‍ അയ്യൂര്‍ (മും​െബെ, എം.ഡി പോമോന എക്‌സ്‌പോര്‍ട്ടിങ്​), കെ.എ. അബ്​ദുൽ മജീദ് (മഞ്ചേശ്വരം), നുസ്ഫത്തുനിസ (ചാവക്കാട്), ജാസ്മിന്‍ (ബേവിഞ്ച). സഹോദരങ്ങള്‍: ചെര്‍ക്കളം അബൂബക്കര്‍, എവറസ്​റ്റ്​ കുഞ്ഞാമു, ആയിശ ബാവിക്കര, ബീബി ബദിയഡുക്ക, പരേതരായ കദീജ പൊവ്വല്‍, എവറസ്​റ്റ്​ അബ്​ദുറഹ്മാന്‍, അബ്​ദുല്‍ ഖാദര്‍ കപാഡിയ, നഫീസ കോട്ടിക്കുളം, അഹമദ്, മമ്മു പുലിക്കുന്ന്.