ഹരിപാട്​ തന്നെയെന്ന്​​ ചെന്നിത്തല; സ്ഥാനാർഥി നിർണയം പൂർത്തിയാകാത്തതിൽ ഹൈക്കമാൻഡിന്​ അതൃപ്​തി

ആലപ്പുഴ: നിയമസഭ തെരഞ്ഞെടുപ്പിൽ ഹരിപ്പാട്​ മണ്ഡലത്തിൽ നിന്ന്​ തന്നെ ജനവിധി തേടുമെന്ന്​ പ്രതിപക്ഷ നേതാവ്​ രമേശ്​ ചെന്നിത്തല. നേമത്ത്​ തർക്കവും പ്രശ്​നങ്ങളുമില്ല. തീരുമാനങ്ങളെല്ലാം ഒറ്റക്കെട്ടായി എടുക്കുമെന്നും ചെന്നിത്തല പറഞ്ഞു.

അതേസമയം, സ്ഥാനാർഥിനിർണയം സമയബന്ധിതമായി പൂർത്തിയാക്കാൻ കഴിയാത്തതിൽ ഹൈക്കമാൻഡിന്​ അതൃപ്​തിയുണ്ടെന്നാണ്​ സൂചന. സ്ഥാനാർഥിനിർണയത്തിന്​ മുമ്പ്​ തന്നെ ഉമ്മൻചാണ്ടിയും ചെന്നിത്തലയും ഡൽഹിയിൽ നിന്ന്​ മടങ്ങിയത്​ തർക്ക മണ്ഡലങ്ങളിലെ കോൺഗ്രസ്​ നേതാക്കളുമായി സംസാരിക്കാനാണെന്ന റിപ്പോർട്ടുകളും പുറത്തുവരുന്നുണ്ട്​.

നേമത്ത്​ ആരു വരുമെന്ന്​ കാത്തിരുന്ന്​ കാണാമെന്നാണ്​ ഉമ്മൻചാണ്ടിയുടെ നിലപാട്​. നേരത്തെ ഉമ്മൻചാണ്ടി നേമത്ത്​ നിന്ന്​ ജനവിധി തേടുമെന്ന റിപ്പോർട്ടുകൾ പുറത്ത്​ വന്നിരുന്നു. ഉമ്മൻചാണ്ടി തന്നെ ഇത്​ നിഷേധിക്കുകയും ചെയ്​തു.