അതൃപ്​തിയ​ുടെ മഞ്ഞുരുക്കത്തിന്​ രാഹുലിന്‍റെ ഇടപെടൽ; ചെന്നിത്തലയെ ഡൽഹിക്ക്​ വിളിപ്പിച്ചു

തിരുവനന്തപുരം: കെ.പി.സി.സി അധ്യക്ഷനായി കെ. സുധാകരൻ ചുമതലയേറ്റതിനു​ പിന്നാലെ മുൻ പ്രതിപക്ഷ നേതാവ്​ രമേശ് ചെന്നിത്തലയെ രാഹുൽ ഗാന്ധി ഡല്‍ഹിയിലേക്ക് വിളിപ്പിച്ചു. അടിയന്തരമായി ഡല്‍ഹിയിലെത്താന്‍ ചൊവ്വാഴ്ച ചെന്നിത്തലയോട്​ രാഹുല്‍ നേരിട്ട്​ ആവശ്യപ്പെടുകയായിരുന്നു.

നിയമസഭാകക്ഷി നേതാവിനെ നിശ്ചയിച്ച രീതിയിൽ രമേശിനുള്ള അതൃപ്തി പരിഹരിക്കുന്നതിനും പാര്‍ട്ടി പുനഃസംഘടനയുമായി ബന്ധപ്പെട്ട ചര്‍ച്ചകള്‍ക്കുമായാണ്​ വിളിപ്പിച്ചതെന്നാണ്​ സൂചന. കെ. സുധാകരന്‍ ചുമതല ഏറ്റെടുക്കുന്ന ചടങ്ങ്​ ബുധനാഴ്​ച നടത്താൻ തീരുമാനിച്ചിരുന്നതിനാൽ കൂടിക്കാഴ്​ച 18 ലേക്ക്​ മാറ്റുകയായിരുന്നു.

നിയമസഭ തെരഞ്ഞെടുപ്പ് തോൽവിയെതുടർന്ന്​ സംസ്ഥാനത്ത്​ ഹൈകമാൻഡ്​ ഏകപക്ഷീയമായി നടപ്പാക്കിയ അഴിച്ചുപണികളിൽ എ,ഐ ഗ്രൂപ്പുകള്‍ക്ക് കടുത്ത അതൃപ്തിയുണ്ട്. പ്രതിപക്ഷനേതാവായി വി.ഡി. സതീശനെ നിശ്ചയിച്ചതിനെ എതിർക്കുന്നില്ലെങ്കിലും അതിന്​ സ്വീകരിച്ച രീതിയോടാണ്​ ഗ്രൂപ്പുകൾക്ക്​ എതിർപ്പ്​.

ഹൈകമാന്‍ഡിനെ തെറ്റിദ്ധരിപ്പിച്ച്​ സംഘടനാ ചുമതലയുള്ള എ.െഎ.സി.സി ജന. സെക്രട്ടറി കെ.സി. വേണുഗോപാലാണ്​ ഇൗ നീക്കങ്ങൾക്ക്​ പിന്നിലെന്നാണ് അവരുടെ നിലപാട്. ഇക്കാര്യം രാഹുലുമായുള്ള കൂടിക്കാഴ്​ചയിലും ചെന്നിത്തല അറിയിച്ചേക്കും. പ്രതിപക്ഷ നേതൃസ്ഥാനത്തുനിന്ന്​ ഒഴിവാക്കിയ സാഹചര്യത്തിൽ ചെന്നിത്തലക്ക്​ ദേശീയതലത്തിൽ പാർട്ടി ചുമതല നൽകുന്നത്​ ഹൈകമാൻഡി​െൻറ പരിഗണനയിലാണ്​.