നിരന്തരമായി ചെന്നിത്തല കേരളത്തെ അപമാനിക്കുന്നു; സംഘപരിവാർ സ്വപ്​നം കാണാത്ത തിരിച്ചടി നൽകും -പിണറായി

തിരുവനന്തപുരം: സംഘപരിവാർ സ്വപ്​നം കാണാത്ത തിരിച്ചടി കേരളം ബി.ജെ.പിക്ക്​ നൽകുമെന്ന്​ മുഖ്യമന്ത്രി പിണറായി വിജയൻ. ​ത്രിപുരയിലുണ്ടായ അട്ടിമറി കേരളത്തിൽ ആവർത്തിക്കുമെന്നാണ്​ ബി.ജെ.പി പ്രചരിപ്പിക്കുന്നത്​. ഇത്​ ഗൗരവതരമാണ്.​ കേരളത്തിൽ തമ്പടിച്ചാണ്​ ബി.ജെ.പി ഈ പ്രചാരണം നടത്തുന്നതെന്നും പിണറായി പറഞ്ഞു.

ഇരട്ടവോട്ടിൽ ചെന്നിത്തലയുടെ വിവരശേഖരണം നിയമപരമായ മാർഗങ്ങളിലൂടെയാണോ എന്നും പിണറായി ചോദിച്ചു. സമൂഹമാധ്യമങ്ങളിലൂടെ നിരന്തരമായി ചെന്നിത്തല കേരളത്തെ അപകീർത്തിപ്പെടുത്തുകയാണ്​. 4.5 ലക്ഷം വോട്ടർമാരെ ചെന്നിത്തല കള്ളവോട്ടർമാരായി ചിത്രീകരിക്കുന്നു. ഇരട്ടവോട്ട്​ പല കാരണങ്ങൾ കൊണ്ട്​ വരാമെന്നും ഇക്കാര്യത്തിൽ തെരഞ്ഞെടുപ്പ്​ കമീഷൻ ജാഗ്രത പുലർത്തണമെന്നും അദ്ദേഹം പറഞ്ഞു. ഒരുകള്ളവോട്ട്​ പോലും ഉണ്ടാവരുതെന്നാണ്​ സർക്കാർ നിലപാടെന്നും അദ്ദേഹം കൂട്ടിച്ചേർത്തു.

ഡാറ്റ സുരക്ഷിതത്വം, സ്വകാര്യത എന്നിവയെ കുറിച്ച്​ പറഞ്ഞവരെല്ലാം ഇപ്പോൾ എവിടെ പോയി. പ്രതിപക്ഷത്തിന്‍റെ ആരോപണങ്ങൾക്ക്​ ജനം മറുപടി പറയുമെന്നും അദ്ദേഹം പറഞ്ഞു.