മാസപ്പടിയിൽ സി.പി.ഐ​ മനംമാറ്റം​ അപ്രതീക്ഷിതം; അവഗണിച്ച്​ നിശബ്​ദമാക്കാൻ സി.പി.എം

തിരുവനന്തപുരം: മാസപ്പടി കേസിൽ മുന്നണിയെ പ്രതിസന്ധിയിലാക്കിയ സി.പി​.ഐയുടെ അപ്രതീക്ഷിത മനംമാറ്റവും തുറന്നുപറച്ചിലും അവഗണിച്ച്​ നിശബ്​ദമാക്കാൻ സി.പി.എം. പി.എം ശ്രീ പദ്ധതിയുമായി ബന്ധപ്പെട്ട്​ മന്ത്രി വി. ശിവൻകുട്ടി പ്രതികരിച്ച​തൊഴിച്ചാൽ സി.പി.എം നേതാക്കളാരും പരസ്യപ്രതികരണത്തിന്​ മുതിർന്നില്ല. ശിവൻകുട്ടിയാ​കട്ടെ സ്വന്തം ഘടകകക്ഷി നേതാവിന്‍റെ ഇടപെടലുകളെ പ്രതിപക്ഷ നേതാവിന്‍റേതിന്​ തുല്യമെന്ന നിലയിലാണ്​ അവതരിപ്പിച്ചതും വിമർശനം കടുപ്പിച്ചതും. ഇതിനെ നിശബ്​ദം പിന്തുണക്കുകയാണ്​ പാർട്ടി. സി.പി.ഐയിലെ ആഭ്യന്തര പ്രശ്​നങ്ങളും സമ്മർദങ്ങളുമാണ്​ ബിനോയിയുടെ പ്രസ്താവനക്ക്​ പിന്നി​ലെന്നാണ്​ സി.പി.എം കരുതുന്നത്​.

സ്വർണക്കടത്ത്​ കേസ്​ കത്തിപ്പടർന്ന കാലത്ത്​ എൽ.ഡി.എഫ്​ യോഗം ചേർന്ന്​ മുഖ്യമന്ത്രിക്ക്​ പിന്തുണ പ്രഖ്യാപിക്കുകയും മുന്നണി നേതൃത്വത്തിൽ ഇ.ഡി ഓഫിസ്​ മാർച്ച്​ അടക്കം സംഘടിപ്പിക്കുകയും ചെയ്​തിരുന്നു. സമാന പിന്തുണ ഇക്കുറി പ്രതീക്ഷിക്കേണ്ടെന്നാണ്​ ബിനോയ്​ വിശ്വത്തിന്‍റെ പ്രതികരണത്തിൽനിന്ന്​ വ്യക്​തമാകുന്നത്​. പാലക്കാട്​ ബ്രൂവറി വിഷയത്തിൽ മുന്നണിക്കുള്ളിൽ കടുത്ത വിയോജിപ്പ്​ ഉയർത്തിയിട്ടും ​സി.പി.​എം മുഖവിലക്കെടുക്കാതെ ഏകപക്ഷീയമായി മുന്നോട്ടുപോയതിൽ സി.പി.ഐക്ക്​ കടുത്ത അമർഷമുണ്ട്​.

ദിവസങ്ങൾക്ക്​ മുമ്പ്​​ മുഖ്യമന്ത്രിക്ക്​ പിന്തുണ പ്രഖ്യാപനം നടത്തിയ പാർട്ടി സെക്രട്ടറിയെ പോലും തിരുത്തിക്കുംവിധം നേതൃയോഗങ്ങളിൽ കടുത്തവിമർശനവും വിയോജനവുമുയരാൻ കാരണം അതാണ്​. മാസപ്പടി കേസിൽ മൂന്ന്​ വിജിലൻസ് കോടതികളിലെയും ഹൈകോടതിയിലെയും അനുകൂല വിധിയുണ്ടെന്ന സി.പി.എം വാദം അംഗീകരിക്കുന്നില്ലെന്ന സൂചനയും സി​.പി.ഐ പ്രതികരണങ്ങളിലുണ്ട്​.

മുഖ്യമന്ത്രിയുടെ മകൾക്കെതിരായ ​കേസിന്‍റെയും പി.എം ശ്രീയുടെയും കാര്യത്തിൽ മാത്രമല്ല, ആശ സമരത്തിലും സി.പി.ഐക്ക്​ വ്യത്യസ്ത നിലപാടാണ്​​. സമരം ഒത്തുതീർപ്പാക്കാത്തതിൽ കടുത്ത വിമർശനമാണ്​ സി.പി.ഐ നേതൃയോഗങ്ങളിൽ ഉയർന്നത്​. ആശ സമരം ഒത്തുതീർപ്പാക്കിയില്ലെങ്കിൽ ഇടതുമുന്നണിക്കും സർക്കാറിനും തിരിച്ചടിയാകുമെന്നാണ്​ സി.പി.ഐ സംസ്ഥാന കൗൺസിൽ വിലയിരുത്തൽ. മുഖ്യമന്ത്രി വിചാരിച്ചാൽ വളരെ വേഗം തീർപ്പാക്കാവുന്ന വിഷയമാണ്​ പിടിവാശിയിൽ അനിശ്ചിതമായി നീളുന്നത്​. തദ്ദേശ തെരഞ്ഞെടുപ്പ്​ ആസന്നമാകുന്ന ഘട്ടത്തിൽ സമരം നീളുന്നത്​ രാഷ്​ട്രീയ തിരിച്ചടിക്കിടയാക്കുമെന്നും സി.പി.ഐ കണക്കുകൂട്ടുന്നു.