കനത്ത മഴക്ക്​ സാധ്യത; വിവിധ ജില്ലകളിൽ ഓറഞ്ച്​ അലർട്ട്​

തിരുവനന്തപുരം: സംസ്ഥാനത്ത്​ ശക്തമായ മഴക്ക്​ സാധ്യതയെന്ന്​ കാലാവസ്​ഥ നിരീക്ഷണ കേന്ദ്രം. വിവിധ ജില്ലകളിൽ ഓറഞ്ച്, മഞ്ഞ അലർട്ട് പ്രഖ്യാപിച്ചു. ശനിയും ഞായറും ഇടുക്കിയിൽ ഒാറഞ്ച്​ അലർട്ട്​ പ്രഖ്യാപിച്ചു. ഇവിടെ ശക്തമായോ അതിശക്തമായോ മഴ പെയ്യാം. ഒറ്റപ്പെട്ടയിടങ്ങളിൽ 24 മണിക്കൂറിൽ 64.5 മുതൽ 204.4 മി.മീറ്റർ വരെ മഴ ലഭിക്കും.

വെള്ളിയാഴ്​ച പത്തനംതിട്ട, ആലപ്പുഴ, എറണാകുളം, ഇടുക്കി ജില്ലകളിലും ശനിയാഴ്​ച കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, തൃശൂർ, മലപ്പുറം, കോഴിക്കോട് ജില്ലകളിലും ഞായറാഴ്​ച കോട്ടയം, എറണാകുളം, തൃശൂർ, മലപ്പുറം, കോഴിക്കോട്, വയനാട്, കണ്ണൂർ ജില്ലകളിലും മഞ്ഞ അലർട്ട്​ പ്രഖ്യാപിച്ചു. 64.5 മുതൽ 115.5 മി.മീറ്റർ വരെ മഴ പെയ്യാം. മഴ തുടരുന്ന സാഹചര്യത്തിൽ താഴ്ന്ന പ്രദേശങ്ങൾ, നദീതീരങ്ങൾ, ഉരുൾപൊട്ടൽ-മണ്ണിടിച്ചിൽ സാധ്യതയുള്ള മലയോര പ്രദേശങ്ങൾ തുടങ്ങിയ സ്ഥലങ്ങളിലുള്ളവർ അതിജാഗ്രത പാലിക്കണം.