വയോധികയുടെ മാല കവർന്ന സംഭവം: അമ്മയും മകളും അറസ്​റ്റിൽ

കൊച്ചി: താന്നിക്കലിൽ 84കാരിയുടെ ഒന്നരപ്പവൻ മാല കവർന്ന കേസിൽ അമ്മയും മകളും പിടിയിൽ. നോർത്ത് പറവൂർ പെരുവാരം അറക് കപ്പറമ്പിൽ വീട്ടിൽ ജിജി (55), മകൾ വിസ്മയ (23) എന്നിവരാണ് അറസ്​റ്റിലായത്. കഴിഞ്ഞ വെള്ളിയാഴ്ച പകൽ സഹായം അഭ്യർഥി​െച്ചത്തിയ ഇവർക്ക്​ ജനലിൽകൂടി ഒരു മുണ്ട് നൽകുന്നതിനിടെ കൈയിട്ട് വയോധികയുടെ കഴുത്തിൽനിന്ന്​ മാല കവർന്ന്​ അതുവഴി വന്ന കാറിന് കൈകാണിച്ച് രക്ഷപ്പെടുകയായിരുന്നു.

ഞായറാഴ്ച രാവിലെ 9.45ഓടെ പറവൂരിലെ വീട്ടിലെത്തിയാണ് എളമക്കര പൊലീസ് പ്രതികളെ അറസ്​റ്റ് ചെയ്തത്. മകൾക്ക് അസുഖമാണെന്നും സഹായിക്കണമെന്നും പറഞ്ഞ് വീടുകൾ കയറിയിറങ്ങുകയായിരുന്നു ഇവരുടെ രീതിയെന്ന് പൊലീസ് പറഞ്ഞു. മാനസികാസ്വാസ്​ഥ്യമുള്ളതുപോലെ വിസ്മയ സംസാരിക്കുകയും വിലപിടിപ്പുള്ള വസ്തുക്കൾ വേണമെന്ന് ആവശ്യപ്പെടുകയും ചെയ്യും. എന്നാൽ, പെൺകുട്ടിക്ക് ഇത്തരത്തിലുള്ള യാതൊരു അസുഖങ്ങളുമില്ലെന്ന് പൊലീസ് സ്ഥിരീകരിച്ചിട്ടുണ്ട്.

പത്രങ്ങളിൽ വാർത്ത വന്നതോടെ ലഭിച്ച രഹസ്യവിവരത്തി​​െൻറ അടിസ്ഥാനത്തിലാണ് പൊലീസ് ഇവരുടെ വീട്ടിലെത്തിയത്. തുടർന്ന് മാല നഷ്​ടപ്പെട്ട വയോധിക പ്രതികളെ തിരിച്ചറിയുകയും ചെയ്തു. അറസ്​റ്റ് ചെയ്ത പ്രതികളെ കോടതിയിൽ ഹാജരാക്കി റിമാൻഡ് ചെയ്തു.എളമക്കര സ്​റ്റേഷൻ ഹൗസ് ഓഫിസർ പി.ടി. ബിജോയ്, എസ്.ഐ പ്രേംകുമാർ, എ.എസ്.ഐ രഘുനന്ദൻ, രാകേഷ്, ഡബ്ല്യു.സി.പി.ഒ ബീന എന്നിവരടങ്ങുന്ന സംഘമാണ് പ്രതികളെ അറസ്​റ്റ് ചെയ്തത്.