ബൈക്കിലെത്തി വയോധികയുടെ സ്വർണമാല പൊട്ടിച്ചു; ദൃശ്യം സി.സി.ടി.വിയിൽ

തിരുവല്ല: തിരുവല്ലയിലെ പൊടിയാടിയിൽ ബൈക്കിൽ എത്തിയ യുവാവ് വയോധികയുടെ മൂന്നേകാൽ പവൻ സ്വർണമാല പൊട്ടിച്ചുകടന്നു. പൊടിയാടി പായിക്കാട്ട് വീട്ടിൽ വിജയമ്മ(67)യുടെ മാലയാണ് കവർന്നത്.

പൊടിയാടി - പെരിങ്ങര കൃഷ്ണ പാദം റോഡിലെ പുതുശ്ശേരി പടിക്ക് സമീപം വ്യാഴാഴ്ച ഉച്ച ഒന്നരയോടെ ആയിരുന്നു സംഭവം. പൊടിയാടി ഭാഗത്തു നിന്നും വീട്ടിലേക്ക് മടങ്ങുകയായിരുന്ന വിജയമ്മയുടെ പിന്നാലെ ബൈക്കിൽ എത്തിയ ആൾ മാല പൊട്ടിച്ചു കടക്കുകയായിരുന്നു.

ഇവരു​ടെ പരാതിയിൽ പുളിക്കീഴ് പൊലീസ് കേസെടുത്തു. സംഭവ സ്ഥലത്തിന് സമീപത്തെ വീട്ടിലെ സിസിടിവിയിൽ നിന്നും ബൈക്കിൽ സഞ്ചരിക്കുന്ന പ്രതിയുടെ ദൃശ്യം ലഭ്യമായെന്നും അന്വേഷണം ഊർജിതമാക്കിയതായും എസ്.ഐ കവിരാജ് പറഞ്ഞു.