സാമൂഹിക നീതി വകുപ്പിന്റെ അനാസ്​ഥ; പുനരധിവാസ കേന്ദ്രത്തിന്റെ ഭൂമികാടുകയറുന്നു

ഓയൂർ(കൊല്ലം): സാമൂഹിക നീതി വകുപ്പിന്റെ അനാസ്​ഥ മൂലം പുനരധിവാസ കേന്ദ്രം കാടുകയറുന്നു. സി.പി.എം. മുൻ സംസ്ഥാന സെക്രട്ടറിയും നിയമസഭാംഗവും ആയിരുന്ന സി.എച്ച്​ കണാര​ന്റെ മകൾ കോഴിക്കോട് എരഞ്ഞിപ്പാലം സരോജ് വിഹാറിൽ സരോജിനിയും ഭർത്താവ്​ കമലാസനനും മാനസിക പ്രശ്നങ്ങൾ നേരിടുന്നവരുടെ പുനരധിവാസത്തിനായി സർക്കറിന്​ വിട്ടു നൽകിയ സ്​ഥലമാണ്​ ഇത്തരത്തിൽ നശിക്കുന്നത്​.

വെളിയം സ്വദേശിയായ കമലാസനൻ, തന്റെ 84 സെൻറ്​ ഭൂമിയും രണ്ടു നില വീടുമാണ്​ കേന്ദ്രത്തിനായി നൽകിയിരുന്നത്​. മാനസിക വെല്ലുവിളി നേരിടുന്ന മകൾ പ്രിയ ( 40 )യുടെ പേരിൽ 'പ്രിയ ഹോം ഫോർമെൻറലി ചലഞ്ച്ഡ് വിമൻ' എന്നാണ് കേന്ദ്രം വിഭാവനം ചെയ്​തിരുന്നത്​. തങ്ങളുടെ കാലശേഷം പ്രിയയുടെ സംരക്ഷണം സർക്കാറിന്റെ ചുമതലയിലാവുകയും ഒപ്പം മറ്റുള്ളവർക്കുമായി കേന്ദ്രം പ്രവർത്തിക്കണമെന്നായിരുന്നു മാതാപിതാക്കളുടെ ഉദ്ദേശം. 2018ലാണ്​ സാമൂഹിക നീതി വകുപ്പ്​ സ്​ഥലം ഏറ്റെടുത്ത്​. കെട്ടിടം നിർമ്മിക്കുന്നതിന്​ ധനവകുപ്പ് 29 ലക്ഷം രൂപ അനുവദിച്ചിരുന്നു. എന്നാൽ തുടർനടപടികൾ ഒന്നും നടന്നില്ല.

കേന്ദ്രത്തിന്റെ നടത്തിപ്പ്​ സ്വകാര്യ ഏജൻസിക്ക് നടത്തിപ്പിനായി വിട്ട് നൽകാനുള്ള നീക്കം നടന്നെങ്കിലും ​സ്​ഥലം അന്യാധീനപ്പെടാനിടയാക്കുമെന്നതിനാൽ കമലാസനൻ അതിനെ അനുകൂലിച്ചില്ല. സർക്കാരല്ലാതെ സ്വകാര്യ ഏജൻസി ഏറ്റെടുത്താൽ ഉദ്ദേശിച്ച ലക്ഷ്യം നടക്കില്ലെന്നും സർക്കാർ നേതൃത്വത്തിൽ തന്നെ കെട്ടിടം നിർമിച്ച് പ്രവർത്തനം നടത്തണമെന്നുമാണ്​ അദ്ദേഹത്തിന്റെ ആവശ്യം. ഇതിനിടെ, കെട്ടിട നിർമാതാക്കൾ വസ്​തുവും വീടും സന്ദർശിച്ച ശേഷം 60 കിടക്കകൾക്ക് നിലവിൽ സാധ്യത ഉണ്ടെന്ന് വലയിരുത്തിയിരുന്നു. സാമൂഹിക നീതി വകുപ്പിന്റെ നേരിട്ടുള്ള നിയന്ത്രണത്തിലായതിനാൽ പഞ്ചായത്തിനും തുടർ നടപടികളുടെ കാര്യത്തിൽ പരിമിതിയുണ്ടെന്ന്​ പഞ്ചായത്ത്​ അധികൃതർ അറിയിച്ചു.