യു.എ.ഇ സഹായം സ്വീകരിക്കേണ്ടതില്ലെന്ന്​​ കേന്ദ്രം

ന്യൂഡൽഹി: പ്രളയക്കെടുതി നേരിടാൻ കേരളത്തി​ന്​ യു.എ.ഇ സർക്കാർ പ്രഖ്യാപിച്ച 700 കോടി രൂപയുടെ ധനസഹായം സ്വീകരിക്കേണ്ടതില്ലെന്ന നിലപാടിലുറച്ച്​ കേന്ദ്ര സർക്കാർ. വിദേശ രാജ്യങ്ങളിൽ നിന്ന്​ ധനസഹായം സ്വീകരിക്കില്ലെന്ന നയത്തിൽ മാറ്റം വരുത്തില്ലെന്നാണ്​ സർക്കാർ വൃത്തങ്ങൾ നൽകുന്ന സൂചന. 

ഇക്കാര്യത്തിൽ സർക്കാർ തലത്തിൽ വിശദമായ ചർച്ചകൾ നടന്നുവെന്നാണ്​ റിപ്പോർട്ട്​. ഇന്ത്യയുടെ സൗഹൃദ രാജ്യം എന്ന നിലക്ക്​ യു.എ.ഇ നൽകുന്ന പണം സ്വീകരിക്കുന്നതിനെ കുറിച്ചായിരുന്നു ചർച്ച. എന്നാൽ മുൻപ്​ ഇത്തരം സന്ദർഭങ്ങളിൽ വിദേശ സഹായം സ്വീകരിച്ചിട്ടില്ലെന്നും ആ നയം മാറ്റേണ്ടെന്നുമുള്ള നിലപാടാണ്​ കേന്ദ്ര സർക്കാറിനെന്നാണ്​ റിപ്പോർട്ട്​. 

രാജ്യങ്ങളുടെ പേരിൽ ധനസഹായം സ്വീകരിക്കില്ലെങ്കിലും വ്യക്​തികളുടെ പേരിൽ സഹായം സ്വീകരിക്കാമെന്നും സർക്കാർ വൃത്തങ്ങൾ പറയുന്നു. വിഷയത്തിൽ തീരുമാനമെടുക്കേണ്ടത്​ വിദേശകാര്യ മന്ത്രാലയമാണ്​. എന്നാൽ യു.എ.ഇയുടെ വാഗ്​ദാനം ഇതുവരെ വി​ദേശകാര്യ മന്ത്രാലയത്തിനു മുന്നി​െലത്തിയിട്ടില്ല. ദുരിതാശ്വാസ നിധിയിലേക്ക്​ പ്രവാസികൾക്കും രജിസ്​റ്റർ ചെയ്​ത സന്നദ്ധ സംഘടനകൾക്കും പണം അയക്കാം. അതിന്​ നികുതി നൽകേണ്ടതില്ല. എന്നാൽ രജിസ്​ട്രേഡ്​ സംഘടനകളല്ലെങ്കിൽ നികുതി നൽകേണ്ടി വരുമെന്നും വിദേശ കാര്യ മന്ത്രാലയം അറിയിച്ചു. 

സഹായം നല്‍കാന്‍ ഏതെങ്കിലും വിദേശ രാജ്യം സന്നദ്ധമാകുകയാണെങ്കില്‍ സര്‍ക്കാരിന് സഹായം സ്വീകരിക്കാമെന്ന് 2016ലെ ദേശീയ ദുരന്തനിവാരണ നയത്തില്‍ വ്യക്തമാക്കുന്നുണ്ട്​.ദുരിതാശ്വാസ പ്രവര്‍ത്തനങ്ങള്‍ക്ക് വിദേശ രാജ്യങ്ങളുടെ സഹായം അഭ്യര്‍ഥിക്കേണ്ട എന്നത് സര്‍ക്കാരിന്‍റെ നിലപാട് മാത്രമാണ്. 2004 വരെ ഇന്ത്യ വിദേശത്ത് നിന്ന് ദുരിതാശ്വാസ സഹായം സ്വീകരിച്ചിരുന്നു. സംസ്ഥാനങ്ങള്‍ നേരിട്ടല്ല കേന്ദ്രസര്‍ക്കാര്‍ വഴിയാണ് ഇത്തരം സഹായങ്ങള്‍ സ്വീകരിക്കുക.