ലോക്കപ്പുകളിൽ സി.സി.ടി.വി കാമറകൾ സ്ഥാപിക്കാൻ ഡി.ജി.പിയുടെ നിർദേശം

തിരുവനന്തപുരം: ലോക്കപ്പുള്ള എല്ലാ പൊലീസ്​ സ്​റ്റേഷനുകളിലും സി.സി.ടി.വി കാമറ നിര്‍ബന്ധമാക്കി ഡി.ജി.പിയുടെ നിർദേശം. രണ്ട് ദിവസത്തിനുള്ളില്‍ സി.സി.ടി.വി കാമറ സ്ഥാപിക്കാനാണ്​ നിർ​ദേശം​. വരാപ്പുഴ കസ്​റ്റഡിമരണത്തി​​​െൻറ പശ്​ചാത്തലത്തിലാണ്​ നടപടി. 471 സ്​റ്റേഷനുകളിലാണ് സി.സി.ടി.വി കാമറകള്‍ സ്ഥാപിക്കുന്നത്​. കാമറ സ്ഥാപിച്ചശേഷം ബില്ലുകൾ സ്​റ്റേഷൻ ഹൗസ് ഓഫിസർമാർ എസ്.പിക്ക് കൈമാറണമെന്നും ഡി.ജി.പി ഉത്തരവിൽ വ്യക്​തമാക്കി. അതാത് സ്​റ്റേഷനിലെ കമ്പ്യൂട്ടറുമായി സി.സി.ടി.വി ബന്ധിപ്പിക്കണം. എല്ലാ ആഴ്ചയും ഹാർഡ് ഡിസ്കിലെ ദൃശ്യങ്ങൾ ഡി.വി.ഡിയിലേക്ക് മാറ്റണമെന്നും ഉത്തരവില്‍ പറയുന്നു.

രാത്രിയിലും വ്യക്തമായ ദൃശ്യങ്ങൾ പകർത്താനാവുന്ന എച്ച്.ഡി കാമറകളായിരിക്കണം സ്​ഥാപിക്കേണ്ടത്​. ഒരുമാസത്തെ സ്​റ്റോറേജുണ്ടാകണം കാമറകൾക്ക്​. ലോക്കപ്പിലെ മൂന്നാംമുറയും മർദനവും പൂർണമായി ഒഴിവാക്കുകയും പൊലീസിനെതിരേയുള്ള ആരോപണങ്ങൾ ഇല്ലാതാക്കാനും ഇതിലൂടെ സാധിക്കുമെന്ന പ്രതീക്ഷയിലാണ്​ നടപടി. സ്​റ്റേഷനുകളുടെ മുൻഭാഗം, എസ്.എച്ച്.ഒ ചേംബർ, സന്ദർശകമുറി, ജി.ഡി ചാർജ് കാബിൻ എന്നിവയും കാമറക്കണ്ണിലാക്കും​.  

ലോക്കപ്പുകളിൽ പ്രതികളെ സൂക്ഷിക്കുന്ന കാര്യത്തിലും കൃത്യമായ മാർഗനിർദേശങ്ങൾ ഡി.ജി.പി നൽകിയിട്ടുണ്ട്​. ഒാരോ സ്​റ്റേഷനുകളിലെയും ലോക്കപ്പിലുള്ള പ്രതികളുടെ വിവരങ്ങൾ ഇൻസ്പെക്ടർമാർ അസി.കമീഷണർക്കും ഡെപ്യൂട്ടി കമീഷണർക്കും കൈമാറണം. ലോക്കപ്പിൽ പ്രതികളുണ്ടെങ്കിൽ സ്​റ്റേഷനുകൾക്ക് കൂടുതൽ സുരക്ഷവേണം. രാത്രി മൂന്ന് പാറാവുകാരുണ്ടാവണം. ലോക്കപ്പുകൾ വൃത്തിയാക്കണം. ഗ്ലാസ്, ബ്ലേഡ്, കുപ്പികൾ, ടോയ്‌ലറ്റ് ക്ലീനർ, അപകടകരമായ വസ്തുക്കൾ എന്നിവ ​വെക്കരുത്. നാട്ടുകാർ പിടിച്ചുതരുന്ന പ്രതികളെ ജനപ്രതിനിധികളുടെ സാന്നിധ്യത്തിൽ ആശുപത്രിയിലെത്തിച്ച് പരിശോധിക്കണം. കസ്​റ്റഡിയിലെടുക്കുമ്പോൾ പ്രതികളുടെ ദേഹത്ത് പരിക്കുകളുണ്ടെങ്കിൽ അക്കാര്യം ഡോക്ടർ രേഖപ്പെടുത്തണം. മദ്യപിച്ച് റോഡരികിൽ കിടക്കുന്നവർക്കും അവശരായവർക്കും വൈദ്യസഹായം ലഭ്യമാക്കണം, വീട്ടിലെത്തിക്കണം.

അറസ്​റ്റിലാവുന്നത് രോഗികളാണെങ്കിൽ രോഗവിവരം മനസ്സിലാക്കി കൃത്യമായി മരുന്ന്, ഭക്ഷണം എന്നിവ അവർക്ക്​ ലഭ്യമാക്കണമെന്നും ഡി.ജി.പി നിർദേശിക്കുന്നു. നിർദേശങ്ങൾക്കൊപ്പം കൂടുതൽ കാര്യങ്ങൾ ഉൾപ്പെടുത്തി ജില്ലാ പൊലീസ്​ മേധാവികൾ സർക്കുലറുകൾ പുറത്തിറക്കുകയും എസ്​.എച്ച്​.ഒ തലം വരെയുള്ള ഉദ്യോഗസ്​ഥരുടെ യോഗങ്ങൾ വിളിച്ചുചേർക്കുകയും ചെയ്​തിട്ടുണ്ട്​.