ഡോ. വന്ദന ദാസ്​ വധം: സി.ബി.ഐ അന്വേഷണ ഹരജി ഒക്​ടോബർ മൂന്നിലേക്ക്​ മാറ്റി

കൊച്ചി: ഡോ. വന്ദന ദാസിനെ കുത്തിക്കൊലപ്പെടുത്തിയ കേസിൽ അന്വേഷണം സി.ബി.ഐക്ക് വിടണമെന്ന്​ ആവശ്യപ്പെടുന്ന ഹരജി ഹൈകോടതി ഓക്​ടോബർ മൂന്നിന്​ പരിഗണിക്കാൻ മാറ്റി. വന്ദനയുടെ മാതാപിതാക്കളായ കെ.ജി. മോഹൻദാസും ടി. വസന്തകുമാരിയും നൽകിയ ഹരജിയാണ്​ ജസ്റ്റിസ് പി.വി. കുഞ്ഞികൃഷ്‌ണൻ മാറ്റിവെച്ചത്​.

സംഭവത്തിൽ പൊലീസിന്റെ ഭാഗത്ത് ഗുരുതര വീഴ്‌ചയുണ്ടെന്നും ഇതു മറച്ചുവെച്ചാണ് അന്വേഷണം നടത്തുന്നതെന്നുമാണ് വന്ദനയുടെ മാതാപിതാക്കളുടെ ആരോപണം. അതേസമയം, അന്വേഷണം ശരിയായ ദിശയിലാണെന്നും സി.ബി.ഐക്ക്​ കൈമാറേണ്ടതില്ലെന്നും സർക്കാർ നേരത്തേ കോടതിയിൽ വ്യക്തമാക്കിയിരുന്നു.

വൈദ്യപരിശോധനക്ക്​ മേയ് പത്തിന് ആശുപത്രിയിൽ കൊണ്ടുവന്ന സന്ദീപ്​ എന്ന ​പ്രതിയാണ്​ കൊട്ടാരക്കര താലൂക്ക് ആശുപത്രിയിലെ ഹൗസ് സർജനായിരുന്ന ഡോ. വന്ദന ദാസിനെ കുത്തിക്കൊലപ്പെടുത്തിയത്.