റോഡ് നിർമാണം തടസപ്പെടുത്തി: ഷാനിമോൾ ഉസ്മാനെതിരെ ജാമ്യമില്ലാ വകുപ്പ് പ്രകാരം കേസ്

അരൂർ: അരൂരിലെ യു.ഡി.എഫ്​ സ്ഥാനാര്‍ഥി ഷാനിമോള്‍ ഉസ്മാനെതിരെ ജാമ്യമില്ല കേസ്. എരമല്ലൂര്‍-എഴുപുന്ന റോഡ് അറ്റകുറ്റപ്പണി തടസ്സപ്പെടുത്തിയതിനാണ്​ അരൂര്‍ പൊലീസ് കേസെടുത്തത്. അസിസ്​റ്റൻറ്​ എക്‌സിക്യൂട്ടിവ് എന്‍ജിനീയറാണ് ഷാനിമോള്‍ക്കെതിരെ പരാതി നല്‍കിയത്. എന്നാല്‍, തെരഞ്ഞെടുപ്പ്​ പെരുമാറ്റച്ചട്ടം ലംഘിച്ചെന്നായിരുന്നു കോണ്‍ഗ്രസ് നേതാക്കളുടെ ആക്ഷേപം.

സെപ്റ്റംബര്‍ 27ന് രാത്രിയാണ് കേസിനാസ്പദമായ സംഭവം. എരമല്ലൂര്‍-എഴുപുന്ന റോഡ് പൊട്ടിപ്പൊളിഞ്ഞ്​ കിടക്കുന്നുവെന്ന പരാതിയെത്തുടര്‍ന്ന് അറ്റകുറ്റപ്പണിക്ക്​ എത്തിയതായിരുന്നു ഉദ്യോഗസ്ഥര്‍. എന്നാല്‍, പെരുമാറ്റച്ചട്ടം നിലവില്‍വന്നതിനുശേഷമുള്ള റോഡ്​ അറ്റകുറ്റപ്പണി വോട്ട്​ പിടിക്കാനുള്ള തന്ത്രമാണെന്ന്​ പറഞ്ഞാണ് കോണ്‍ഗ്രസ് പ്രവര്‍ത്തകര്‍ തടസ്സപ്പെടുത്തിയത്. തുടര്‍ന്ന് അവിടെയെത്തിയ ഷാനിമോള്‍ ഉസ്മാന്‍, പെരുമാറ്റച്ചട്ടം ലംഘിച്ചുള്ള ഒരു പ്രവര്‍ത്തനവും നടക്കില്ലെന്നും ഒരു കല്ലുപോലും ഇടാന്‍ സമ്മതിക്കില്ലെന്നും പറഞ്ഞു.

പ്രതിഷേധത്തെതുടര്‍ന്ന്​ ഉദ്യോഗസ്ഥര്‍ മടങ്ങിപ്പോയെങ്കിലും പിന്നീട് ജില്ല പൊലീസ് മേധാവിക്ക് അസിസ്​റ്റൻറ്​ എക്‌സിക്യൂട്ടിവ് എന്‍ജിനീയര്‍ പരാതി നല്‍കുകയായിരുന്നു. പൊതുമരാമത്ത് വകുപ്പി​​​െൻറ പ്രവൃത്തി തടസ്സപ്പെടുത്തിയെന്നാണ് കേസ്. ഷാനിമോള്‍ക്കൊപ്പം അഞ്ച്​ കോണ്‍ഗ്രസ് നേതാക്കള്‍ക്കും കണ്ടാലറിയാവുന്ന മറ്റു പ്രവര്‍ത്തകര്‍ക്കുമെതിരെയാണ് കേസ്. കേസ്​ രാഷ്​ട്രീയപ്രേരിതമാണെന്ന് കോണ്‍ഗ്രസ് നേതാവ് എ.എ. ഷുക്കൂര്‍ പറഞ്ഞു.

ഷാനിമോൾ ഉസ്​മാനെതിരായ കേസ്: തെരഞ്ഞെടുപ്പ്​ കമീഷന്​ പരാതി നൽകിയെന്ന്​ പി.ടി. തോമസ്​
ചേർത്തല: ഉപതെരഞ്ഞെടുപ്പ് നടക്കുന്ന അരൂർ മണ്ഡലത്തിൽ തെരഞ്ഞെടുപ്പ് ചട്ടം ലംഘിച്ച് റോഡ് നിർമിക്കുന്നത് ചോദ്യംചെയ്ത യു.ഡി.എഫ് സ്ഥാനാർഥി ഷാനിമോൾ ഉസ്​മാനെതിരെ ജാമ്യമില്ല വകുപ്പ് പ്രകാരം പൊലീസ്​ കേസ്​ രജിസ്​റ്റർ ചെയ്തതിനെതിരെ തെരഞ്ഞെടുപ്പ് കമീഷന് പരാതി നൽകിയതായി പി.ടി. തോമസ്​ എം.എൽ.എ.

വകുപ്പുമന്ത്രിമാരടക്കം ഭരണസ്വാധീനം ഉപയോഗിച്ച് തെരഞ്ഞെടുപ്പ് അട്ടിമറിക്കാനാണ് സി.പി.എം ശ്രമിക്കുന്നത്. റോഡുകൾ ടെൻഡർ നടപടിപോലും നടത്താതെ കരാറുകാരെക്കൊണ്ട്​ നിർമാണം നടത്തുകയാണ്. അർധരാത്രി യന്ത്രങ്ങൾ ഉപയോഗിച്ച് റോഡുകൾ പൊളിച്ച് പുനർനിർമിക്കുന്ന പ്രവർത്തനങ്ങളാണ് നടത്തുന്നത്. ഇതേക്കുറിച്ച്​ അന്വേഷിച്ചതി​​​െൻറ പേരിലാണ് സ്ഥാനാർഥിയുടെ പേരിൽ ജാമമ്യമില്ല വകുപ്പ് പ്രകാരം കേസെടുത്തത്. ഇത് പ്രതിഷേധാർഹമാണ്. സംസ്ഥാനത്ത് ആദ്യമായാണ് ഒരു സ്ഥാനാർഥിയുടെ പേരിൽ ജാമ്യമില്ല വകുപ്പ് പ്രകാരം കേസെടുക്കുന്നത്. ഈ കേസിൽ സ്ഥാനാർഥി ജാമ്യമെടുക്കില്ലെന്നും ജയിലിൽ കിടന്ന് തെരഞ്ഞെടുപ്പിനെ നേരിടുമെന്നും അദ്ദേഹം വാർത്തസമ്മേളനത്തിൽ പറഞ്ഞു.

സർക്കാർ നടപടിക്കെതിരെ വെള്ളിയാഴ്ച നിയോജക മണ്ഡലത്തിലെ 18 മണ്ഡലം കമ്മിറ്റികളുടെ നേതൃത്വത്തിൽ പ്രതിഷേധം സംഘടിപ്പിക്കും. കലക്​ടറേറ്റിലെയും താലൂക്ക് ഓഫിസിലെയും ഉദ്യോഗസ്ഥരെ ഉപയോഗിച്ച് മണ്ഡലത്തിലെ വീടുകളിൽ കയറി ആനുകൂല്യങ്ങൾ നൽകുമെന്ന് വാഗ്ദാനം നൽകുകയാണ്. ധന, പൊതുമരാമത്ത്, മത്സ്യ, വിദ്യാഭ്യാസ, ഭക്ഷ്യ മന്ത്രിമാർ മണ്ഡലത്തിൽ ഭരണസ്വാധീനം ഉപയോഗിച്ച് ഉദ്യോഗസ്ഥരെക്കൊണ്ടാണ് തെരഞ്ഞെടുപ്പ് ചട്ടം ലംഘിച്ച് പ്രവർത്തനം നടത്തുന്നത്. പ്രളയദുരിതാശ്വാസത്തി​​െൻറ കണക്കെടുപ്പും ലൈഫ് മിഷൻ പ്രകാരം വീട് വാഗ്ദാനവുമടക്കം നടത്തുകയാണ്. സി.പി.എം വർഗീയരാഷ്​ട്രീയമാണ് കളിക്കുന്നത്. ജാതിയും ഉപജാതിയും വർണവും വർഗവും പറയാതെ രാഷ്​ട്രീയം പറഞ്ഞ് വോട്ട് പിടിക്കാനുള്ള ആർജവം കാണിക്കണമെന്ന് അദ്ദേഹം ആവശ്യ​െപ്പട്ടു.

അരൂരിലെ വിമതസ്ഥാനാർഥിക്ക് കോൺഗ്രസുമായി ബന്ധമില്ല. ഇതിനുപിന്നിൽ സി.പി.എമ്മി​​​െൻറ കൈകളാണ്​. സമൂഹമാധ്യമങ്ങളിലൂടെ സ്ഥാനാർഥിയെ വ്യക്തിഹത്യ ചെയ്യുന്ന പ്രചാരണം നടത്തുന്നു. ഇത് രാഷ്​ട്രീയ പാപ്പരത്തമാണ്. പരാജയഭീതി പൂണ്ടാണ് ഇവർ ഇത്തരത്തിൽ പ്രവർത്തിക്കുന്നതെന്നും വിമതസ്ഥാനാർഥി യു.ഡി.എഫിന് ഭീഷണിയല്ലെന്നും പി.ടി. തോമസ്​ പറഞ്ഞു.വാർത്തസമ്മേളനത്തിൽ ഡി.സി.സി പ്രസിഡൻറ് എം. ലിജു, യു.ഡി.എഫ് ചെയർമാൻ പി.കെ. ഫസലുദ്ദീൻ, കൺവീനർമാരായ ദിലീപ് കണ്ണാടൻ, കെ. ഉമേശൻ എന്നിവരും പ​ങ്കെടുത്തു.