കുറ്റൂരിലെ വീടാക്രമണം; പഞ്ചായത്ത്​ പ്രസിഡന്‍റ്​ അടക്കം 30 പേർക്കെതിരെ വധശ്രമത്തിന്​ കേസ്​

തിരുവല്ല: കുറ്റൂരിലെ തെങ്ങേലിയിൽ ബോംബെറിഞ്ഞ് ഭീകരാന്തരീക്ഷം സൃഷ്​ടിച്ച്​ വയോധികനെ വെട്ടിപ്പരിക്കേൽപ്പിച്ച സംഭവത്തിൽ ഗ്രാമപഞ്ചായത്ത് പ്രസിഡന്‍റ്​ അടക്കം 30 പേർക്കെതിരെ കേസ്​. ഗ്രാമപഞ്ചായത്ത് പ്രസിഡന്‍റ്​​ കെ.ജി. സഞ്​ജുവടക്കം 30 പേർക്കെതിരെയാണ്​ വധശ്രമം, സ്​ത്രീത്വത്തെ അപമാനിക്കൽ തുടങ്ങി ജാമ്യമില്ലാത്ത വകുപ്പുകൾ ചേർത്ത്​ കേസെടുത്തിരിക്കുന്നത്​.

തെങ്ങേലി പുതിരിക്കാട്ട് വീട്ടിൽ രമണന്‍റെ (71) വീട്​ ആക്രമിക്കുകയും വെട്ടുകയും ചെയ്തെന്ന പരാതിയിലാണ്​ കേസെടുത്തത്​. സഞ്​ജുവിന്‍റെ നേതൃത്വത്തിൽ ഇരുപതോളം സി.പി.എം പ്രവർത്തകർ ചേർന്ന്​ ബോംബെറിഞ്ഞ ശേഷം ജെ.സി.ബി ഉപയോഗിച്ച്​ വീടിന്‍റെ മതിൽ പൊളിക്കുകയും തടയുന്നതിനിടെയാണ്​ രമണനെ വെട്ടിപ്പരിക്കേൽപ്പിച്ചെന്നുമാണ്​ കേസ്​. ഞായറാ​ഴ്ച രാത്രി പന്ത്രണ്ട് മണിയോടെ ആയിരുന്നു സംഭവം. ജീപ്പിലും കാറിലുമായി എത്തിയ സംഘം രമണന്‍റെ വീട്ടുമുറ്റത്തേക്ക് ബോംബ് എറിയുകയായിരുന്നു. തുടർന്ന് ജെ.സി.ബി ഉപയോഗിച്ച് മതിൽ പൊളിച്ചു. ഇത് തടയാൻ ശ്രമിക്കുന്നതിനിടെയാണ് രമണന് വെട്ടേറ്റത്. ഇടതു കൈക്ക് വെട്ടേറ്റ ഇ​ദ്ദേഹത്തെ തിരുവല്ല താലൂക്ക് ആശുപത്രിയിൽ പ്രവേശിപ്പിച്ചു.

തന്‍റെ വീടിന് പിന്നിലുള്ള ആറ് വീട്ടുകാർക്ക് വേണ്ടി രമണന്‍റെ സ്​ഥലത്തുകൂടി നാലടി വഴി നൽകിയിരുന്നു. ഇതിന് ശേഷം ബാക്കിയുള്ള ഭൂമി മതിൽ കെട്ടി തിരിച്ചു. ഈ മതിലാണ് പഞ്ചായത്ത് പ്രസിഡന്‍റിന്‍റെ നേതൃത്വത്തിലുള്ള സംഘം ജെ.സി.ബിയുമായി എത്തി പൊളിച്ചത്. എന്നാൽ, സംഭവമറിഞ്ഞ് സ്ഥലത്തെത്തിയതാണെന്നാണ്​ സഞ്​ജു പറയുന്നത്​.