അമീൻ യാത്രയായി, വേദനയില്ലാത്ത ലോകത്തിലേക്ക്

പേരാമ്പ്ര: ബന്ധുക്കളും ലോകത്തിന്റെ വിവിധ ഭാഗങ്ങളിലുള്ള സുമനസുകളും നാട്ടുകാരും ഒരുമിച്ച് കൈകോർത്തെങ്കിലും അമീൻ മുഹമ്മദിനെ മരണത്തിന്റെ കരങ്ങളിൽ നിന്നും രക്ഷിക്കാനായില്ല. നാലു വർഷത്തോളമായി ചാലിക്കര കായൽ മുക്കിലെ മുനീറിന്റെ മകൻ അമീൻ മുഹമ്മദ്​ കാൻസർ ബാധിച്ച് ചികിത്സയിലായിരുന്നു. ആദ്യ ഘട്ടത്തിൽ ബന്ധുക്കളും പിന്നീട് നാട്ടുകാരുമാണ്​ ചികിത്സാ ചെലവിന് പണം കണ്ടെത്തിയത്​.

തിരുവനന്തപുരം ആർ.സി.സി യിലെ ചികിത്സക്ക് ശേഷം ഭേദമായെങ്കിലും രണ്ട് വർഷത്തിനു ശേഷം കാൻസർ വീണ്ടും ആ കുഞ്ഞു ശരീരം കാർന്നു തിന്നാൻ തുടങ്ങി. ഡോക്ടർമാർ മജ്ജ മാറ്റി വെക്കൽ ശസ്ത്രക്രിയ നിർദ്ദേശിച്ചു. ഇതിന് 40 ലക്ഷം രൂപയായിരുന്നു ചെലവ്. ഇത് കണ്ടെത്താൻ ജീവകാരുണ്യ പ്രവർത്തകൻ ഫിറോസ് കുന്നുംപറമ്പിലി​െൻറ സഹായം തേടിയിരുന്നു. ഇൗ വീഡിയോ സാമൂഹികമാധ്യമങ്ങളിൽ പ്രചരിപ്പിച്ചതോടെ ചികിത്സാ ചിലവിനുള്ള പണം ലഭിച്ചു. ആറു മാസം മുമ്പ് എറണാകുളം അമൃതയിൽ നിന്ന് മജ്ജ മാറ്റി വെക്കൽ ശാസ്ത്രക്രിയ നടന്നെങ്കിലും കഴിഞ്ഞ ദിവസം അമീൻ മരണത്തിന് കീഴടങ്ങുകയായിരുന്നു.