ആകാശ് തില്ലങ്കേരിയുടെ ജാമ്യം റദ്ദാക്കൽ: ഹരജി വീണ്ടും മാറ്റി

തലശ്ശേരി: യൂത്ത് കോൺഗ്രസ് നേതാവ് മട്ടന്നൂർ എടയന്നൂരിലെ ഷുഹൈബിനെ കൊലപ്പെടുത്തിയ കേസിൽ ജാമ്യം റദ്ദാക്കണമെന്ന ഹരജിക്കെതിരെ ഒന്നാം പ്രതി ആകാശ് തില്ലങ്കേരി. ഹരജി നിലനിൽക്കില്ലെന്ന് ആകാശിനുവേണ്ടി ഹാജരായ അഭിഭാഷകൻ പി. രാജൻ തലശ്ശേരി മൂന്നാം അഡീഷനൽ ജില്ല കോടതിയിൽ മറുപടി നൽകി.

തുടർന്ന് കേസിൽ വാദം കേൾക്കാനായി ജഡ്ജി റൂബി കെ. ജോസ് മാർച്ച് 15ലേക്ക് മാറ്റി. ഷുഹൈബ് വധക്കേസിൽ ആകാശ് തില്ലങ്കേരിയുടെ ജാമ്യം റദ്ദാക്കണമെന്നാവശ്യപ്പെട്ട് മട്ടന്നൂർ പൊലീസാണ് പബ്ലിക് പ്രോസിക്യൂട്ടർ അഡ്വ.കെ. അജിത് കുമാർ മുഖേന കോടതിയിൽ ഹരജി നൽകിയത്.