നിയമനം റദ്ദാക്കൽ: കുഫോസ് മുൻ വി.സി സുപ്രീംകോടതിയിൽ

ന്യൂഡല്‍ഹി: കേരള ഫിഷറീസ്-സമുദ്ര പഠന സര്‍വകലാശാല (കുഫോസ്) വി.സി നിയമനം റദ്ദാക്കിയ ഹൈകോടതി ഉത്തരവിനെതിരെ മുന്‍ വി.സി കെ. റിജി ജോണ്‍ സുപ്രീംകോടതിയെ സമീപിച്ചു. യു.ജിസി ചട്ടം പാലിച്ചില്ലെന്ന വാദം അംഗീകരിച്ച് നിയമനം റദ്ദാക്കിയ ഹൈകോടതി ഉത്തരവ് ചോദ്യംചെയ്താണ് റിജി ജോണ്‍ അപ്പീല്‍ നല്‍കിയത്. ഹരജി നവംബർ 25ന് പരിഗണിക്കും.

എറണാകുളം സ്വദേശിയായ ഡോ. കെ.കെ. വിജയന്‍, ഡോ. സദാശിവന്‍ എന്നിവര്‍ നല്‍കിയ ഹരജിയിലായിരുന്നു ഡോ. റിജി ജോണിന്‍റെ നിയമനം റദ്ദാക്കിക്കൊണ്ടുള്ള ഹൈകോടതി ഉത്തരവ്. യു.ജി.സി മാനദണ്ഡങ്ങള്‍ ലംഘിക്കപ്പെട്ടെന്നും പുതിയ വി.സിയെ തിരഞ്ഞെടുക്കാന്‍ യു.ജി.സി മാനദണ്ഡം അനുസരിച്ച് സെര്‍ച്ച് കമ്മിറ്റി രൂപവത്കരിക്കണമെന്നും കോടതി നിര്‍ദേശിച്ചിരുന്നു.