ധനകമ്മിയും റവന്യൂ കമ്മിയും കടബാധ്യതകളും കുറഞ്ഞില്ലെന്ന് സി.എ.ജി
text_fields
തിരുവനന്തപുരം: റവന്യൂ കമ്മിയും ധനകമ്മിയും കടബാധ്യതകളും കുറക്കാൻ സംസ്ഥാന സർക്കാർ മുന്നോട്ടുവെച്ച ലക്ഷ്യം നേടാനായില്ലെന്ന് കംട്രോളർ-ഓഡിറ്റ് ജനറൽ റിപ്പോർട്ട്. ധന ഉത്തരവാദ നിയമത്തിൽ 2021-22 മുതൽ 2025-26 കാലയളവിൽ റവന്യൂ കമ്മി പൂർണമായി ഇല്ലാതാക്കാനും റവന്യൂ മിച്ചം ജി.എസ്.ഡി.പിയുടെ .05 മുതൽ 2.5 ശതമാനം എന്ന നിലയിൽ വർധിപ്പിക്കാനുമാണ് ലക്ഷ്യമിട്ടത്. ധനകമ്മി 2025-26 ൽ മൊത്തം സംസ്ഥാന ആഭ്യന്തര ഉൽപാദനത്തിന്‍റെ മൂന്ന് ശതമാനത്തിലേക്ക് കുറക്കാനും കടബാധ്യത 2021-22ൽ ജി.എസ്.ഡി.പിയുടെ 34.70 ശതമാനമായി കുറക്കാനും ലക്ഷ്യമിട്ടിരുന്നു. എന്നാൽ റവന്യൂ കമ്മി പൂജ്യമാകേണ്ട സ്ഥാനത്ത് 2021-22ൽ 3.27 ശതമാനമായി ഉയർന്നു-29539.27 കോടി രൂപ. ധനകമ്മി 4.5 ശതമാനം ആകേണ്ട സ്ഥാനത്ത് 5.10 ശതമാനമാണ്-46045.78 കോടി.
കടബാധ്യതകൾ 34.70 ശതമാനം ലക്ഷ്യമിട്ട സ്ഥാനത്ത് 38.65 ശതമാനമായി -348653.46 കോടി. ധനകമ്മി, റവന്യൂ കമ്മി, കടങ്ങൾ എന്നിവയെല്ലാം ധനഉത്തരവാദിത്ത നിയമം ലക്ഷ്യമിട്ടതിനെക്കാൾ കൂടുതലാണെന്ന് റിപ്പോർട്ട് പറയുന്നു. റവന്യൂ ചെലവ് 123446.33 കോടിയിൽനിന്ന് 2021-22ൽ 146179.51 കോടിയായി ഉയർന്നു. 18.42 ശതമാനമാണ് വർധന. മൂലധന ചെലവ് 12889.65 കോടിയിൽനിന്ന് 14191.73 കോടിയായി.
10.10 ശതമാനമാണ് കൂടിയത്. റവന്യൂ വരുമാനം 163225.53 കോടിയായി. ജി.എസ്.ടി വരുമാനം 20.68 ശതമാനം വർധിച്ചു. 20028.31 കോടിയിൽ നിന്ന് 2021-22ൽ 24169.81 കോടിയിലെത്തി. 4141.50 കോടിയാണ് വർധന. 2021-22 ബജറ്റിൽ ലക്ഷ്യമിട്ട വരുമാനം 130422.06 കോടിയായിരുന്നു. എന്നാൽ 116640.24 കോടിയേ ലഭിച്ചുള്ളൂ- 89.43 ശതമാനം. നികുതി-നികുതിയേതര വരുമാനം, ഗ്രാന്‍റ് ഇൻ എയ്ഡ് എന്നിവയിലെല്ലാം കുറവ് വന്നു. നികുതിയേതര വരുമാനം 72.98 ശതമാനമേ ലഭിച്ചുള്ളൂ. മൊത്തം ചെലവുകൾ ബജറ്റ് ലക്ഷ്യമിട്ടതിന്‍റെ 89.09 ശതമാനം മാത്രമാണ്. ഇതിൽ പദ്ധതിയേതര മൂലധന വിഭാഗത്തിൽ 23.70 ശതമാനം മാത്രമാണ് ചെലവ്.