ജാതിക്കോളം: തെറ്റുണ്ടെങ്കിൽ തിരുത്തുമെന്ന് മന്ത്രി

കോഴിക്കോട്: സ്​കൂൾ വിദ്യാർഥികളുടെ ജാതി^മത കോളവുമായി ബന്ധപ്പെട്ടുണ്ടായ വിവാദത്തിൽ വിശദീകരണവുമായി വിദ്യാഭ്യാസ മന്ത്രി സി. രവീന്ദ്രനാഥ്. സംസ്ഥാനത്തെ സ്​കൂളുകളിൽ ജാതി കോളം പൂരിപ്പിക്കാതെ ഒന്നേകാൽ ലക്ഷം കുട്ടികളുണ്ടെന്ന കണക്കിൽ പിശകുണ്ടെങ്കിൽ തിരുത്തുമെന്ന് അദ്ദേഹം മാധ്യമപ്രവർത്തകരോട് പറഞ്ഞു. 

നിയമസഭയിൽ ഉന്നയിച്ച ചോദ്യത്തിന് ലഭിച്ച കണക്കുകളുടെ അടിസ്​ഥാനത്തിലുള്ള സാങ്കേതികമായ മറുപടി മാത്രമാണ് നൽകിയത്. കണക്കിൽ പിഴവുണ്ടെന്ന ആരോപണം ഉയർന്നതിനാൽ അന്വേഷിച്ച് റിപ്പോർട്ട് നൽകാൻ പൊതുവിദ്യാഭ്യാസ ഡയറക്ടറോട് ആവശ്യപ്പെട്ടിട്ടുണ്ട്. ജാതിക്കോളം പൂരിപ്പിക്കാത്ത എത്ര കുട്ടികളുണ്ടെന്നാണ് നിയമസഭയിൽ ഉന്നയിക്കപ്പെട്ട ചോദ്യം. ഈ കോളം പൂരിപ്പിക്കാതെ ഒന്നേകാൽ ലക്ഷം പേരാണുള്ളതെന്നാണ് സോഫ്റ്റ്്വെയറിലുള്ളത്. ഇൗ വിവരം അറിയിക്കുക മാത്രമാണ് ചെയ്തത്. അല്ലാതെ ഒരുതരത്തിലും കണക്കുകളെ വളച്ചൊടിക്കാനോ മറ്റോ സർക്കാർ ശ്രമിച്ചിട്ടില്ല. സാങ്കേതിക പ്രശ്നങ്ങൾമൂലം വിവരങ്ങൾ അപ്​ലോഡ് ആകാത്ത കാര്യമെല്ലാം പിന്നീടാണ് ഉയർന്നത്. ഇതുസംബന്ധിച്ച് അന്വേഷിച്ച് റിപ്പോർട്ട് നൽകാൻ നിർദേശിച്ചിട്ടുണ്ട്​.

വയനാട് നീർവാരം ഗവ. ഹയർസെക്കൻഡറി സ്കൂളിൽ ആദിവാസി വിദ്യാർഥികളെ പരീക്ഷ എഴുതാൻ അനുവദിച്ചില്ലെന്ന പരാതി അന്വേഷിക്കും. കാഞ്ഞങ്ങാട് പടന്നക്കാട് നെഹ്റു കോളജിൽ പ്രിൻസിപ്പലിന് യാത്രയയപ്പ് ചടങ്ങിൽ എസ്.എഫ്.ഐ പ്രവർത്തകർ ‘ആദരാഞ്​ജലി’ അർപ്പിച്ചെന്ന ആരോപണം സംബന്ധിച്ച്​ ഡയറക്ടർ ഓഫ് കൊളീജിയറ്റ്​ എജുക്കേഷനോട് റിപ്പോർട്ട് തേടിയിട്ടുണ്ടെന്നും ഇതു​ ലഭിച്ചശേഷം പ്രതികരിക്കാമെന്നും മന്ത്രി അറിയിച്ചു.