'പിണറായിയുടെ വ്യക്​തിപ്രഭാവം മനസ്സിലാക്കണം'; മുഖ്യമന്ത്രിയെ പുകഴ്​ത്തി സി.കെ. പത്മനാഭൻ

കണ്ണൂർ: മുഖ്യമന്ത്രി പിണറായി വിജയനെ പുകഴ്​ത്തി ബി.ജെ.പി നേതാവ്​ സി.കെ. പത്മനാഭൻ. എ.പി. അബ്​ദുല്ലക്കുട്ടിക്ക്​ ദേശീയ വൈസ്​ പ്രസിഡൻറ്​ സ്​ഥാനം നൽകിയതുകൊണ്ട്​ പാർട്ടിക്ക്​ എന്തെങ്കിലും നേട്ടം ഉണ്ടായിട്ടുണ്ടോയെന്ന്​ വ്യക്​തമാ​ക്കേണ്ടത്​ കേന്ദ്ര നേതൃത്വമാണെന്നും അദ്ദേഹം പറഞ്ഞു. ധർമടം മണ്ഡലത്തിൽ മുഖ്യമന്ത്രിക്കെതിരെ മത്സരിച്ച, ബി.ജെ.പി മുൻ സംസ്​ഥാന പ്രസിഡൻറു കൂടിയായ സി.കെ. പത്മനാഭൻ അഴീക്കോ​െട്ട വീട്ടിൽ മാധ്യമ പ്രവർത്തകരോട്​ സംസാരിക്കവേയാണ്​ നേതൃത്വത്തിനെതിരെ വിമർശനം ഉന്നയിച്ചത്​.

പിണറായി വിജയ​െൻറ വ്യക്​തിപ്രഭാവം മനസ്സിലാക്കണം. ഒരു തീരുമാനമെടുത്താൽ എന്തെല്ലാം എതിർപ്പുകൾ ഉണ്ടെങ്കിലും അതിൽ ഉറച്ചുനിൽക്കുന്ന വ്യക്​തിയാണ്​ അദ്ദേഹം. അഞ്ചുവർഷം അദ്ദേഹത്തിന്​ പ്രതിപക്ഷത്തുനിന്നൊക്കെ നേരിടേണ്ടിവന്ന എതിർപ്പുകളെ അചഞ്ചലമായ നിലപാട്​ സ്വീകരിച്ചാണ്​​ നേരിട്ടത്​. ഇത്​ കേരളത്തിലെ ജനങ്ങൾ കണ്ടതാണ്​. അദ്ദേഹം പ്രതിപക്ഷത്തി​െൻറ ഇരയാകു​ന്നു​ണ്ടെന്ന ചിന്ത ജനങ്ങളിൽ ഉണ്ടായിട്ടുണ്ടെന്നും പത്മനാഭൻ പറഞ്ഞു.

എ.പി. അബ്​ദുല്ലക്കുട്ടിയെ ദേശീയ വൈസ്​ പ്രസിഡൻറ്​ ആക്കിയതുകൊണ്ട്​ എന്തെങ്കിലും നേട്ടം ഉണ്ടായിട്ടുണ്ടോയെന്ന്​ കേന്ദ്രനേതൃത്വം പരിശോധിക്ക​ണമെന്നും അദ്ദേഹം ആവശ്യപ്പെട്ടു. ഡൽഹിയിൽ ഇരിക്കുന്ന ആളുകൾക്ക്​ ഇവിടത്തെ യാഥാർഥ്യങ്ങൾ മനസ്സിലാക്കാൻ കഴിയുന്നില്ല.

ബി.ജെ.പിക്ക്​ വലിയ വോട്ടുചോർച്ചയാണ്​ എല്ലാ മണ്ഡലങ്ങളിലും ഉണ്ടായത്​. ധർമടത്ത്​ മത്സരിക്കാൻ ഒട്ടും താൽപര്യമുണ്ടായിരുന്നില്ല. നേതൃത്വം മാറിയതുകൊണ്ട്​ ഫലമില്ല. പ്രവർത്തന ശൈലിയിൽ മാറ്റം വരുത്തണം- സി.കെ.പത്മനാഭൻ പറഞ്ഞു.