ഉപതെരഞ്ഞെടുപ്പ്: പുറമേരിയിൽ യു.ഡി.എഫിന് അട്ടിമറി ജയം

വടകര: പുറമേരി ഗ്രാമ പഞ്ചായത്ത് 14ാം വാർഡായ കുഞ്ഞല്ലൂരിൽ നടന്ന ഉപതെരഞ്ഞെടുപ്പിൽ യു.ഡി.എഫിന് അട്ടിമറി ജയം. യുഡിഎഫ് സ്ഥാനാർത്ഥി അജയൻ പുതിയോട്ടിൽ 22​ വോട്ടുകൾക്കാണ് എൽ.ഡി.എഫ് സിറ്റിങ് സീറ്റ് പിടിച്ചെടുത്തത്. എൽ.ഡി.എഫ് സ്ഥാനാഥി അഡ്വ. വിവേക് കൊടുങ്ങാംപുറത്ത് പരാജയപ്പെട്ടു.

കഴിഞ്ഞ തവണ എൽ.ഡി.എഫ് സ്ഥാനാർഥി 175 വോട്ടുകൾക്കാണ് വിജയിച്ചത്. എൽ.ഡി.എഫിലെ പഞ്ചായത്ത് വൈസ് പ്രസിഡൻറായിരുന്ന എം.പി. വിജയൻ മാസ്റ്ററുടെ നിര്യാണത്തെ തുടർന്നാണ് ഉപതെരഞ്ഞെടുപ്പ് നടന്നത്. യുഡിഎഫ് സ്ഥാനാർഥിയുടെ വിജയത്തോടെ പുറമേരി പഞ്ചായത്തിൽ കക്ഷി നില എൽ.ഡി.എഫിന് ഒമ്പതും യു ഡി എഫിന് എട്ടുമായി. സി.പി.എം ശക്തി കേന്ദ്രത്തിൽ പാർട്ടിക്ക് കാലിടറിയത് നേതൃത്വത്തെ ഞെട്ടിച്ചിട്ടുണ്ട്.