വയനാട് ചുരത്തിൽ ബസ് കുടുങ്ങി; വൻ ഗതാഗതക്കുരുക്ക് -VIDEO

വൈത്തിരി: വയനാട് ചുരത്തിൽ കെ.എസ്.ആർ.ടിസിയുടെ മൾട്ടി ആക്സിൽ വോൾവോ ബസ് ബ്രേക് ഡൗണായതിനെ തുടർന്ന് കടുത്ത ഗതാഗതക്കുരുക്ക്. ഏഴാം വളവിലാണ് ബസ് കേടായത്. ലക്കിടി മുതൽ അടിവാരം വരെ വാഹനങ്ങളുടെ നീണ്ടനിരയാണ്. ഇന്ന് രാവിലെ ഏഴരമണിക്ക് തുടങ്ങിയ ഗതാഗതക്കുരുക്ക് 10 മണിയായിട്ടും മാറിയിട്ടില്ല.

അവധി ദിനം ആഘോഷിക്കാൻ വയനാട്ടിലേക്ക് പുറപ്പെട്ട സഞ്ചാരികളുടെ നൂറുകണക്കിന് വാഹനങ്ങളാണ് ചുരത്തിൽ കുടുങ്ങിക്കിടക്കുന്നത്. അടിവാരം പൊലീസും ഹൈവേ പൊലീസും ചുരം സംരക്ഷണ സമിതി പ്രവർത്തകരും ഗതാഗതക്കുരുക്ക് പരിഹരിക്കാൻ സജീവമായി രംഗത്തുണ്ട്.