കണ്ണൂരിൽ ബസ് പുഴയിലേക്ക് മറിഞ്ഞ് അമ്മയും മകനുമടക്കം മൂന്നു മരണം

പെരിങ്ങത്തൂർ (കണ്ണൂർ): പെരിങ്ങത്തൂർ പുഴയിലേക്ക് ബസ് മറിഞ്ഞ് അമ്മയും മകനുമടക്കം മൂന്നുപേർ മരിച്ചു. ഡ്രൈവർ പരിക്കുകളോടെ രക്ഷപ്പെട്ടു. ബംഗളൂരുവിൽനിന്ന്​​  വരുകയായിരുന്ന ലക്ഷ്വറി ബസ്​  ‘ലാമ’യാണ് പാലത്തി​​െൻറ കൈവരി തകർത്ത് പുഴയിലേക്ക് മറിഞ്ഞത്.
ബംഗളൂരു സ്ഥിരവാസികളായ മേനപ്രത്തെ പുത്തലത്ത് പ്രേമലത (55), മകൻ പ്രജിത്ത് (32), ബസ്​ ക്ലീനർ കൂത്തുപറമ്പിലെ ജിത്തു എന്ന ജിതേഷ് (40) എന്നിവരാണ് മരിച്ചത്. ഡ്രൈവർ കൂത്തുപറമ്പ് വേറ്റുമ്മൽ സ്വദേശി ദേവദാസിനെ (46) പരിക്കുകളോടെ തലശ്ശേരി ഇന്ദിരഗാന്ധി ആശുപത്രിയിൽ പ്രവേശിപ്പിച്ചു.  

ചൊവ്വാഴ്ച പുലർച്ച അഞ്ചരയോടെയാണ് സംഭവം. എതിരെവന്ന ബൈക്കിനെ​ വെട്ടിച്ചപ്പോൾ നിയന്ത്രണം വിട്ട്​ കൈവരിയിലിടിച്ച്​ പുഴയിലേക്ക്​ മറിയുകയായിരുന്നുവെന്ന്​ പരി​​ക്കേറ്റ്​ ആശുപത്രിയിൽ കഴിയുന്ന  ഡ്രൈവർ പറഞ്ഞു. ശബ്​ദംകേട്ട് ഓടിയെത്തിയ പ്രദേശവാസികളാണ് ആദ്യം രക്ഷാപ്രവർത്തനത്തിന് നേതൃത്വം നൽകിയത്. അഗ്​നിശമന സേനയും പൊലീസും വൈകാതെ സ്​ഥലത്തെത്തി. പൂർണമായും വെള്ളത്തിൽ മുങ്ങിയ ബസിനുള്ളിൽ കൂടുതൽ ​യാത്രക്കാരുണ്ടാവുമെന്ന ഭീതിയായിരുന്നു ആദ്യം. നാട്ടുകാർ തോണികളുമായെത്തി ബസിൽനിന്ന്​ മൂന്നുപേരെയും പുറത്തെടുക്കു​േമ്പാഴേക്കും മരിച്ചിരുന്നു. 

അപകടത്തിൽ മരിച്ച പ്രേമലത

 

ലോക്കിങ്​ ഡോർ സംവിധാനമുള്ള ബസായതിനാൽ അകത്തുള്ളവർക്ക്​ രക്ഷപ്പെടുക പ്രയാസമായിരുന്നു. വീഴ്​ചയിൽ തെറിച്ചുപോയതുകൊണ്ടാണ്​ ഡ്രൈവർ രക്ഷപ്പെട്ടത്​. തലശ്ശേരി-ബംഗളൂരു റൂട്ടിൽ സർവിസ്​ നടത്തുന്ന ബസ്​​ യാത്രക്കാരെ ഇറക്കിയ ശേഷം ചൊക്ലി പാറാലിൽ പതിവുപോലെ നിർത്തിയിടാൻ വരുകയായിരുന്നു. മേനപ്രത്ത്​ ഇറങ്ങേണ്ടതുകൊണ്ടാണ്​ പ്രേമലതയും പ്രജിത്തും ബസിൽ തന്നെ ഇരുന്നത്​. വീടെത്താൻ രണ്ട്​ കിലോമീറ്റർ മാത്രം ശേഷിക്കേയാണ്​ അപകടം. ആറുമണിക്കൂർ നേരത്തെ കഠിനശ്രമത്തിനൊടുവിലാണ്​ പുഴയിലെ മണലിൽ കുടുങ്ങിയ ബസ് കരക്കെത്തിച്ചത്. സംഭവമറിഞ്ഞ് പെരിങ്ങത്തൂർ പാലം ജനനിബിഡമായതിനാൽ വാഹന ഗതാഗതം പൂർണമായി സ്തംഭിച്ചു. പൊലീസ്​ ഏറെ ശ്രമിച്ചാണ് ആംബുലൻസടക്കമുള്ളവയെ കടത്തിവിട്ടത്​. 

തയ്യിൽ ചന്ദ്ര​​െൻറ ഭാര്യയാണ്​ പ്രേമലത. പ്രജിഷ മറ്റൊരു മകളാണ്​. സഹോദരൻ: പ്രേമദാസൻ (ഗുജറാത്ത്​). സംസ്​കാരം ബുധനാഴ്​ച വൈകിട്ട്​ അഞ്ചിന്​ വീട്ടുവളപ്പിൽപാട്യം കൊങ്ങാറ്റയിൽ കുഞ്ഞിപറമ്പത്ത്​ പരേതരായ നാണുവി​​െൻറയും ജാനുവി​​െൻറയും മകനാണ്​ ജിതേഷ്​. ഭാര്യ: സഹിന. മകൾ: വൈഷ്​ണവി, കൃഷ്​ണപ്രിയ. സഹോദരങൾ: പ്രേമി, പ്രദീപ്​ കുമാർ, പ്രസീദ, സന്തോഷ്​. മുതദേഹം ബുധനാഴ്​ച രാവിലെ ഒമ്പതിന്​ എ.കെ.ജി പൊതുജന വായനശാലയിൽ പൊതുദർശനത്തിന്​ വെക്കും. തുടർന്ന്​ കിഴക്കെ കതിരൂർ ചെട്ട്യാംപറമ്പിലെ വീട്ടുവളപ്പിൽ സംസ്​കരിക്കും.